स्वास्थ्य बीमा नवीकरण गर्नुअघि परिवारका सबै सदस्यको केवाईसी विवरण अनिवार्य अद्यावधिक गर्नुपर्ने

काठमाडौँ, कात्तिक २९ गते । स्वास्थ्य बीमा बोर्डले स्वास्थ्य बीमाको नवीकरण प्रक्रियालाई थप व्यवस्थित, पारदर्शी र विश्वसनीय बनाउने उद्देश्यले नयाँ तथा अनिवार्य व्यवस्था लागू गरेको छ।

बोर्डका अनुसार अब स्वास्थ्य बीमा नवीकरण गर्नुअघि परिवारका सबै सदस्यको व्यक्तिगत विवरण (केवाईसी) अद्यावधिक गर्नुपर्नेछ। बोर्डका अध्यक्ष डा. सुवास प्याकुरेलले बीमितले बोर्डको आधिकारिक एचआईबी ई–पोर्टलमा प्रवेश गरेर आफ्नो पुरानो विवरण हेर्न सक्ने र त्यसपछि परिवारका सबै सदस्यको केवाईसी अद्यावधिक गरेर मात्र नवीकरण प्रक्रिया अघि बढाउन सकिने जानकारी दिनुभएको छ।

यसअघि बीमाको विवरण अद्यावधिक गर्न दर्ता सहयोगीको सहायता लिनुपर्ने बाध्यता रहेकामा अब बीमितहरूले आफैँ अनलाइनमार्फत परिवारका सदस्यहरूको विवरण अद्यावधिक गर्न सक्ने सुविधा प्रदान गरिएको छ।

हाल स्वास्थ्य बीमामा करिब १ करोड ९ लाख नागरिक आबद्ध रहेका छन् भने तीमध्ये ७६ लाखले नवीकरण गरिसकेका छन्। बीमामा आबद्ध करिब साढे १३ लाख ज्येष्ठ नागरिक लगायतका बीमितहरूको वास्तविक अवस्था पहिचान गर्न, मृत्यु भइसकेका व्यक्तिको विवरण समयमै हटाउन र अभिलेखलाई त्रुटिरहित बनाउन यो व्यवस्था अपरिहार्य भएको बोर्डले प्रस्ट पारेको छ।

केवाईसी विवरणलाई राष्ट्रिय परिचयपत्रसँग समेत आबद्ध गरिने भएकाले बीमितको पहिचान र प्रमाणीकरणमा अझ बढी सहजता आउने अपेक्षा गरिएको छ। यसबाट एउटै व्यक्तिको नाममा दोहोरो विवरण रहने समस्या हट्नेछ र वास्तविक लाभग्राहीहरूले मात्र राज्यबाट प्रदान गरिने सामाजिक सुरक्षा तथा स्वास्थ्य बीमा सुविधाको सही रूपमा उपभोग गर्न पाउनेछन्।

बैंक खाता सञ्चालन गरे जस्तै स्वास्थ्य बीमामा पनि आधिकारिक र अद्यावधिक तथ्यांक राख्न यो कानुनी तथा प्राविधिक व्यवस्थाले महत्त्वपूर्ण भूमिका खेल्ने विश्वास लिइएको छ।