हामी जे बोल्छौँ, त्यही गर्छौं र जे गर्छौं, त्यही बोल्छौँ : सभापति रवि लामिछाने

काठमाडौँ, कात्तिक २८ गते । राष्ट्रिय स्वतन्त्र पार्टी (रास्वपा) का सभापति रवि लामिछानेले जनताले पार्टीप्रति देखाएको अपार आशा, विश्वास र भरोसामाथि कहिल्यै तुषारापात हुन नदिने दृढ प्रतिबद्धता व्यक्त गर्नुभएको छ।

छठ पर्वको सु-अवसर पारेर रास्वपाद्वारा जनकपुरधाममा आयोजित शुभकामना आदान-प्रदान तथा भेटघाट कार्यक्रमलाई सम्बोधन गर्दै उहाँले अब राजनीतिमा आश्वासन र वाचापत्र मात्र बाँड्ने दिन गएको बताउँदै सिधै परिणाममुखी काम गरेर देखाउने उल्लेख गर्नुभयो। “हामी जे बोल्छौँ, त्यही गर्छौं र जे गर्छौं, त्यही बोल्छौँ,” उहाँले जनताको विश्वासलाई हर-हालतमा जोगाउने अङ्गीकार गर्नुभयो।

टिकट वितरण र आन्तरिक सुशासनको विषयमा कडा रूपमा प्रस्तुत हुँदै सभापति लामिछानेले पार्टीको विधि, विधान र स्थापित प्रक्रिया विपरीत टिकट वितरणका नाममा आर्थिक लेनदेन गर्ने जो-कोहीलाई पनि बिनाकुनै छुट कडा कारबाही गरिने चेतावनी दिनुभयो।

रास्वपाको मुख्य उद्देश्य गरिब तथा विपन्न बस्तीहरूमा टिकटको राजनीति गर्नु नभई शिक्षा, स्वास्थ्य र रोजगारीका अवसरहरू पुर्‍याउनु रहेको उहाँको भनाइ थियो। यो ऐतिहासिक अवसर कुनै व्यक्ति वा गुटलाई खुसी पार्नका लागि नभई आम जनताको अनुहारमा खुसी र मुस्कान ल्याउनका लागि प्राप्त भएको उहाँले प्रष्ट पार्नुभयो।

देशको समसामयिक राजनीतिक परिस्थिति र सरकारका काम-कारबाहीबारे बोल्दै सभापति लामिछानेले आफ्नो पार्टी सरकारमा भए पनि वा नरहे पनि जनताको हित र राष्ट्रिय सरोकारका विषयमा जहिले पनि सही कामको दृढ समर्थन र गलत कामको कडा विरोध गर्ने स्पष्ट पार्नुभयो। यसलाई उहाँले स्वस्थ आन्तरिक लोकतन्त्रको सुन्दर अभ्यासका रूपमा व्याख्या गर्नुभयो।

सरकारले जनतासमक्ष गरेको प्रत्येक बाचा र प्रतिबद्धतालाई पूरा गर्न आफूहरू तल्लीन रहेको र नागरिकको अपेक्षा अनुरूपको परिणाम देखाउनै पर्नेमा उहाँले विशेष जोड दिनुभयो।

छठ पर्व मनाउनका लागि जनकपुरधाम आइपुग्नुभएका सभापति लामिछानेको यस कार्यक्रममा पार्टीका विभिन्न तहका नेता तथा कार्यकर्ताहरूको बाक्लो र उत्साहजनक सहभागिता रहेको थियो।