चिनियाँ भ्रमणलाई फलदायी बनाउन रास्वपा सभापति रवि लामिछानेद्वारा निर्देशन : महामन्त्री विपिन आचार्यको नेतृत्वमा उच्चस्तरीय टोली चीन जाँदै

काठमाडौँ, कात्तिक २८ गते । राष्ट्रिय स्वतन्त्र पार्टी (रास्वपा) का सभापति रवि लामिछानेले आगामी चीन भ्रमणलाई अत्यन्तै फलदायी र प्रभावकारी बनाउन भ्रमण दलका सदस्यहरूलाई विशेष निर्देशन दिनुभएको छ।

सभापतिको निवासमा शनिबार आयोजित छलफल कार्यक्रममा सभापति लामिछानेले भ्रमणको मूल उद्देश्यमा केन्द्रित हुन र निर्धारित आचार-संहिता तथा मर्यादाको पूर्ण-पालना गर्न आग्रह गर्नुभएको मुख्य सचेतक कविन्द्र बुर्लाकोटीले जानकारी दिनुभएको छ।

चिनियाँ कम्युनिस्ट पार्टी (सिपिसी) को औपचारिक निमन्त्रणामा रास्वपाका महामन्त्री विपिन आचार्यको नेतृत्वमा पार्टीको एक उच्चस्तरीय प्रतिनिधिमण्डल यही कात्तिक २९ गतेदेखि चीनको औपचारिक भ्रमणमा प्रस्थान गर्दैछ। भ्रमणको सम्पूर्ण आवश्यक तयारी र द्विपक्षीय भेटघाटलाई सफल बनाउने विषयमा सभापति लामिछानेबाट महत्त्वपूर्ण मार्ग-निर्देशन प्राप्त भएको पार्टीले जनाएको छ।

यस उच्चस्तरीय भ्रमण टोलीमा महामन्त्री विपिन आचार्यको नेतृत्वमा सांसदहरू गणेश पराजुली, हरि ढकाल, कविन्द्र बुर्लाकोटी, लिमा अधिकारी आचार्य, समीक्षा बास्कोटा, सागर ढकाल, सुशान्त वैदिक, रिमा विश्वकर्मा, रमेशकुमार सापकोटा लगायतका विभिन्न क्षेत्रका विशेषज्ञ तथा नेताहरूको सहभागिता रहनेछ।

साथै, यस टोलीमा डा. धनञ्जय रेग्मी, गजला शमिम मिकरानी, श्रीराम न्यौपाने, डा. राम लामा, पुनमकुमारी अग्रवाल, डा. आनन्दबहादुर चन्द, डा. सुजाता तामाङ, पुष्पाकुमारी चौधरी, अरविन्द शाह र रत्ना थापा समेत गरी २० भन्दा बढी सदस्यहरू संलग्न रहने बताइएको छ।

यो भ्रमणले नेपाल र चीनबीचको सम्बन्धलाई थप सुदृढ बनाउन र आपसी हितका विषयमा छलफल गर्न महत्त्वपूर्ण भूमिका खेल्ने विश्वास गरिएको छ।