पद र प्रतिष्ठाभन्दा देश, जनता र पार्टीको जिम्मेवारी ठुलो छ : शेरबहादुर देउवा

काठमाडौँ, कात्तिक २८ गते । पूर्व-प्रधानमन्त्री एवम् नेपाली कांग्रेसका पूर्वसभापति शेरबहादुर देउवाले व्यक्तिगत पद र प्रतिष्ठाभन्दा देश, जनता र पार्टीप्रतिको जिम्मेवारी सधैँ उच्च र महत्त्वपूर्ण हुने बताएका छन्।

नेपाली कांग्रेसको देउवा पक्षीय ललितपुर जिल्लाको १५औँ नियमित अधिवेशनलाई महालक्ष्मीस्थानमा उद्घाटन गर्नुहुँदै उहाँले आफूलाई अब कुनै पनि राजकीय वा दलीय पदको लालसा नरहेको प्रस्ट पार्दै पार्टी र राष्ट्रको हितका लागि अन्तिम समयसम्म योगदान गरिरहने अङ्गीकार गर्नुभयो।

पार्टीभित्र देखिएका आन्तरिक विवाद र विशेष महाधिवेशनसम्बन्धी आवाजहरूलाई विधि, विधान र पार्टीको वैधानिक तथा न्यायिक प्रक्रियाबाटै समाधान गरिनुपर्नेमा उहाँले विशेष जोड दिनुभयो।

कांग्रेस जनताको अपार त्याग, सङ्घर्ष र बलिदानबाट स्थापित ऐतिहासिक पार्टी भएकाले यसलाई कुनै पनि व्यक्ति वा समूहले आफ्नो स्वार्थ अनुकूल नियन्त्रण गर्न नसक्ने उहाँको भनाइ थियो। पार्टीको गौरवशाली इतिहास, परम्परा र राजनीतिक विरासतको पूर्ण सम्मान गर्दै सबै नेता तथा कार्यकर्ताहरू आपसी मन-मुटाव बिर्सिएर एकताबद्ध भएर अगाडि बढ्नुपर्ने वर्तमानको मुख्य आवश्यकता रहेको उहाँले औँल्याउनुभयो।

कार्यक्रममा कांग्रेसका अन्य शीर्ष नेताहरूले पनि पार्टीको आन्तरिक सुदृढीकरण र समयमै हुने नियमित महाधिवेशनमार्फत सक्षम नेतृत्व चयनको अपरिहार्यता औँल्याएका थिए।

कार्यक्रममा मन्तव्य राख्ने वक्ताहरूमा कांग्रेस नेता मदनबहादुर अमात्य, राष्ट्रियसभा सदस्य जीतजङ्ग बस्नेत, बागमती प्रदेशका पूर्वमन्त्री उर्मिला केसी नेपाल र निवर्तमान क्षेत्रीय सभापति महेश्वर थापा लगायत रहेका थिए। उनीहरूले पार्टीभित्र लोकतान्त्रिक अभ्यासलाई थप मजबुत बनाउनुपर्ने धारणा राखेका थिए।

यस अधिवेशनले ललितपुर कांग्रेसमा नयाँ नेतृत्व चयन गर्ने र आगामी राजनीतिक दिशा तय गर्न महत्त्वपूर्ण भूमिका खेल्ने विश्वास गरिएको छ।