मधेश प्रदेशका मुख्यमन्त्री कृष्णप्रसाद यादवद्वारा राजीनामा : विश्वासको मत लिने बैठकमा गरे पदत्याग घोषणा

जनकपुरधाम, कात्तिक २८ गते । मधेश प्रदेशका मुख्यमन्त्री कृष्णप्रसाद यादवले पदबाट राजीनामा दिनुभएको छ।

दुई सत्ता साझेदार दलहरू नेकपा (एमाले) र नेपाल कम्युनिस्ट पार्टी (नेकपा) ले सरकारलाई दिएको समर्थन फिर्ता लिएपछि अल्पमतमा पर्नुभएका मुख्यमन्त्री यादवले शनिबार बसेको प्रदेशसभाको बैठकमा आफ्नो मन्तव्य राख्दै पदबाट राजीनामा दिने घोषणा गर्नुभएको हो। यसअघि नै विश्वासको मत लिनका लागि प्रदेशसभाको बैठक आह्वान गरिएको भए पनि स्पष्ट बहुमत नपुग्ने भएपछि उहाँले मत विभाजन हुनुअघि नै मार्गप्रशस्त गर्नुभएको छ।

गत असोज २५ गते एमालेका मन्त्रीहरूले सामूहिक राजीनामा गर्दै सरकारको समर्थन फिर्ता लिएका थिए भने कात्तिक २० गते नेकपाका मन्त्रीहरूले पनि सरकार छोडेका थिए। १०७ सदस्यीय मधेश प्रदेशसभामा सरकार गठन तथा कायम राख्न कम्तीमा ५४ सांसदको बहुमत आवश्यक पर्छ। हाल संसद्मा नेपाली कांग्रेसका २२, एमालेका २३, जसपा नेपालका २७, नेकपाका १५, जनमत पार्टीका १२ तथा संघीय समाजवादी र राप्रपाका १–१ सदस्य कायम रहेका छन्।

प्रदेशसभाको यस कार्यकालमा संसद् बैठकबाटै सम्बोधन गरी राजीनामा गर्ने मुख्यमन्त्री यादव पाँचौँ व्यक्ति बन्नुभएको छ। यसअघि सरोजकुमार यादव (महोत्तरी), जितेन्द्र सोनल, सतिशकुमार सिंह र सरोजकुमार यादव (बारा) ले पनि विभिन्न कारणले विश्वासको मत नपाउने भएपछि पद गुमाउन वा राजीनामा दिनुपरेको थियो।

मुख्यमन्त्री यादवको राजीनामासँगै मधेश प्रदेशमा नयाँ सत्ता समीकरण अन्तर्गत सरकार गठनको बाटो खुल्ला भएको छ।