मधेश प्रदेशका मुख्यमन्त्री कृष्णप्रसाद यादवले आज विश्वासको मत लिँदै : नयाँ समीकरणका कारण सरकार सङ्कटमा

जनकपुरधाम, कात्तिक २८ गते । मधेश प्रदेशका मुख्यमन्त्री कृष्णप्रसाद यादवले आज शनिबार बस्ने प्रदेशसभाको बैठकमा विश्वासको मत लिने हुनुभएको छ।

नेकपा (एमाले) र नेकपाले प्रदेश सरकारलाई दिएको समर्थन फिर्ता लिएपछि अल्पमतमा पर्नुभएका मुख्यमन्त्री यादवले संवैधानिक प्रावधान अनुसार ३० दिनभित्र विश्वासको मत लिनुपर्ने बाध्यता अनुरूप यो प्रक्रिया अगाडि बढाउनुभएको हो। नेपालको संविधानको धारा १६८ को उपधारा (४) बमोजिम आज दिउँसो १ बजे विश्वासको मत लिने व्यवस्था मिलाउन मुख्यमन्त्री यादवले प्रदेशसभा सचिवालयलाई यसअघि नै औपचारिक पत्र पठाइसक्नुभएको छ।

मुख्यमन्त्रीको पत्रानुसार प्रदेशसभा सचिवालयले समेत शनिबार दिउँसो १ बजेका लागि प्रदेशसभाको बैठक आह्वान गरिसकेको जनाएको छ। १०७ सदस्यीय मधेश प्रदेशसभामा हाल १०३ जना प्रदेशसभा सदस्यहरू कायम रहेका छन् भने सरकार गठन तथा कायम राख्न ५२ सांसदको स्पष्ट बहुमत आवश्यक पर्छ।

हाल प्रदेशसभामा जसपा नेपालका २८, एमालेका २४, नेपाली कांग्रेसका २२, नेकपाका १५, जनमत पार्टीका १२, नेपाल संघीय समाजवादी पार्टीका १ र राप्रपाका १ जना सदस्य कायम छन्।

राजनीतिक विश्लेषकहरूका अनुसार मधेश प्रदेशमा नयाँ सत्ता समीकरण बन्ने सम्भावना प्रबल रहेकोले मुख्यमन्त्री यादवले विश्वासको मत प्राप्त गर्ने सम्भावना अति न्यून रहेको छ। एमाले मधेश प्रदेश संसदीय दलका नेता सरोजकुमार यादवले जसपा नेपाल, एमाले र नेकपाबीच नयाँ सत्ता समीकरण निर्माण गर्ने विषयमा आन्तरिक सहमति भइसकेको जानकारी दिनुभएको छ।

समर्थक दलहरूले बाटो मोडेसँगै मुख्यमन्त्री यादव नेतृत्वको सरकार ढल्ने निश्चित जस्तै बनेको छ र प्रदेशमा नयाँ राजनीतिक खिचतानी सुरु भएको छ।