एनपीएल : सुदूरपश्चिम रोयल्सद्वारा काठमान्डु गोर्खाजलाई ७ रनले पराजित, १० अङ्कका साथ शीर्ष स्थानमा

काठमाडौँ, कात्तिक २७ गते । नेपाल प्रिमियर लिग (एनपीएल) क्रिकेट अन्तर्गत शुक्रबार भएको निकै रोमाञ्चक खेलमा सुदूरपश्चिम रोयल्सले काठमान्डु गोर्खाजमाथि ७ रनको कठिन जित हात पारेको छ। लिग चरणका सुरुवाती तीन खेलमध्ये दुईमा पराजित भएको सुदूरपश्चिमले त्यसयता उत्कृष्ट पुनरागमन गर्दै लगातार चार खेल जितेको छ र कुल १० अङ्कका साथ तालिकाको शीर्ष स्थानमा उक्लिएको छ।

यद्यपि, लुम्बिनी र काठमान्डुको खेलस्थितिले शीर्ष दुईमा स्थान भने पूर्ण रूपमा सुरक्षित भइसकेको छैन। टस हारेर पहिले ब्याटिङको निम्तो पाएको सुदूरपश्चिमले निर्धारित २० ओभरमा ६ विकेट गुमाएर १ सय २५ रनको सामान्य योगफल तयार पारेको थियो। जवाफमा आएको काठमान्डुले पनि खराब ब्याटिङ प्रदर्शन गर्दै २० ओभरमा ७ विकेट गुमाएर १ सय १८ रनमात्र बनाउन सक्यो।

सुदूरपश्चिमको इनिङ्स सुरुवातमै निकै खैलाबैलापूर्ण रहेको थियो। टिमको स्कोर मात्र ८ रन हुँदा ओपनर स्कट कुग्लेन (६), ब्रान्डन म्याकमुलेन (०), इशान पाण्डे (०) र विनोद भण्डारी (१) लाई सस्तैमा गुमाएर सुदूरपश्चिम गहिरो दबाबमा परेको थियो। तर त्यसपछि कप्तान दीपेन्द्रसिंह ऐरीले संकटमोचन गर्दै ५५ बलमा ५ चौका र २ छक्कासहित सर्वाधिक ६० रनको महत्त्वपूर्ण म्याच जिताउने इनिङ्स खेले। उनले आरिफ शेख (१६) र थारिन्दु रत्नायके (नटआउट २६) संग महत्त्वपूर्ण साझेदारी गर्दै टिमलाई सम्मानजनक योगफलसम्म पुर्याए। बलिङतर्फ काठमान्डुका जहाँन्दद खानले ३ र सन्तोषले २ विकेट लिएका थिए।

सामान्य लक्ष्य पछ्याउने क्रममा ब्याटिङमा उत्रिएको काठमान्डुको सुरुवात पनि अत्यन्त खराब रह्यो। भीम सार्की पहिलो बलमै आउट भए भने साम हेजलेट (११) रनआउट हुन पुगे। मध्यक्रममा मोहम्मद आदिल आलम (८) र कप्तान करण केसी (८) पनि चल्न सकेनन्। रशिद खानले ३१ बलमा ५ चौका प्रहार गर्दै अविजित ३५ रन र दुशान हेमन्थाले २१ रन बनाए पनि टोलीलाई जिताउन पर्याप्त भएन। सुदूरपश्चिमका बलर अनिल खरेलले घातक बलिङ गर्दै ४ ओभरमा १८ रन खर्चेर २ विकेट लिए भने स्कट कुग्लेन, हेमन्त धामी र फाबियन एलेनले १–१ विकेट हात पारे।

यस रोमान्चक जितसँगै सुदूरपश्चिमले काठमान्डुमाथि लगातार तेस्रो सिजनमा विजयको सिलसिला कायम राखेको छ भने काठमान्डुले प्रतियोगितामा दोस्रो हार बेहोरेको छ।