भीमफेदी दुर्घटनाप्रति रवि लामिछानेद्वारा दुःख व्यक्त : घाइतेको निःशुल्क उपचार र उचित राहतको माग

काठमाडौँ, कात्तिक २६ गते । राष्ट्रिय स्वतन्त्र पार्टीका सभापति रवि लामिछानेले मकवानपुरको भीमफेदीमा भएको यात्रुवाहक सवारीसाधन दुर्घटनामा परी सर्वसाधारण नागरिकले अकालमै ज्यान गुमाउनु परेको घटनाले आफूलाई अत्यन्त मर्माहत र स्तब्ध बनाएको बताउनुभएको छ।

छठ पर्व मनाउन आफ्नो घरतर्फ फर्किरहेका यात्रुहरू सवार गाडी दुर्घटनामा पर्दा एउटै बस्ती र टोलमा ठुलो बज्रपात परेको उल्लेख गर्दै उहाँले यो अकल्पनीय पीडा शब्दमा व्यक्त गर्न असम्भव रहेको जनाउनुभएको छ।

सामाजिक सञ्जालमार्फत शोक सन्देश जारी गर्दै सभापति लामिछानेले यस दुःखद घडीमा दुर्घटनामा परी ज्यान गुमाउने सम्पूर्ण मृतकहरूप्रति भावपूर्ण श्रद्धाञ्जली अर्पण गर्नुका साथै शोकाकुल परिवारजनमा गहिरो समवेदना प्रकट गर्नुभएको छ। साथै, उहाँले दुर्घटनामा परी गम्भीर घाइते भएका सम्पूर्ण नागरिकहरूको शीघ्र र पूर्ण स्वास्थ्यलाभको कामनासमेत गर्नुभएको छ।

छठ पर्वको उमङ्गमा हुनुपर्ने परिवारहरूमा आएको यस ब्रजपातले समाजलाई नै शोकाकुल बनाएको छ। दुर्घटनाका कारण उत्पन्न यस गम्भीर परिस्थितिमा सरकार र सम्बन्धित निकायको गम्भीर ध्यानाकर्षण गराउँदै सभापति लामिछानेले घाइतेहरूको सम्पूर्ण उपचार खर्च निःशुल्क रूपमा मिलाउन तथा मृतकका परिवारलाई तत्काल उचित राहत एवं क्षतिपूर्ति उपलब्ध गराउन जोडदार माग गर्नुभएको छ।

पछिल्लो समय चाडपर्वका बेला हुने यस्ता सडक दुर्घटनाहरूले ठुलो मानवीय क्षति निम्त्याउने गरेकाले यातायात व्यवस्था र सडक सुरक्षामा दीर्घकालीन सुधारको आवश्यकता रहेको औँल्याइएको छ।