देउसी-भैलोमा अश्लील नृत्य प्रदर्शन गरेको आरोपमा दुईजना पक्राउ

रुपन्देही, कात्तिक २६ गते । रुपन्देही जिल्लाका विभिन्न स्थानमा देउसी-भैलो खेल्ने क्रममा नेपाली मौलिक कला, संस्कृति, सामाजिक शिष्टाचार तथा नैतिकताको प्रतिकूल हुने गरी अश्लील तथा अमर्यादित नृत्य प्रदर्शन गरेको आरोपमा प्रहरीले दुईजनालाई पक्राउ गरेको छ।

गए राति १२ बजेको समयमा इलाका प्रहरी कार्यालय लुम्बिनीबाट खटिएको विशेष प्रहरी टोलीले लुम्बिनी सांस्कृतिक नगरपालिका वडा नं. १० महिलावार बजार क्षेत्रबाट उनीहरूलाई नियन्त्रणमा लिएको हो। सार्वजनिक हित र नैतिकता विरुद्धको कसूरअन्तर्गत उनीहरूमाथि थप अनुसन्धान भइरहेको प्रहरीले जनाएको छ।

जिल्ला प्रहरी कार्यालय रुपन्देहीका प्रहरी नायव उपरीक्षक कृष्णकुमार चन्दले दिएको जानकारी अनुसार यसरी पक्राउ पर्नेमा रुपन्देहीको देवदह नगरपालिका वडा नं. ७ बस्ने ३० वर्षीया चाहना थापा र सर्लाहीको हरिवन नगरपालिका वडा नं. ३ बस्ने २१ वर्षीया प्राप्ती बस्नेत रहेका छन्। तिहारको चाडपर्वका नाममा मौलिक संस्कृति विपरीत विकृति भित्र्याउने र सामाजिक मर्यादामा आँच पुर्याउने गतिविधि बढेपछि प्रहरीले निगरानी बढाएको छ।

चाडपर्वको गरिमा र सामाजिक सदभाव कायम राख्न तथा यस प्रकारका अमर्यादित क्रियाकलापहरूलाई नियन्त्रण गर्न सुरक्षा निकाय कडा रूपमा प्रस्तुत भएको छ। सांस्कृतिक पर्वहरूमा हुने यस्ता विकृतिहरूले युवापुस्तामा नराम्रो असर पार्ने भन्दै स्थानीय स्तरबाट पनि प्रहरीको यस कदमप्रति चासो र समर्थन व्यक्त गरिएको छ।

पक्राउ परेकाहरूमाथि प्रचलित कानुनबमोजिम सार्वजनिक शान्ति तथा नैतिकता विरुद्धको मुद्दामा आवश्यक कारबाही अगाडि बढाइने प्रहरीले जनाएको छ।