उपत्यकामा छठ पर्वको तयारी तीव्र : १७ स्थानमा घाट निर्माण र सरसफाइको काम अन्तिम चरणमा

काठमाडौँ, कात्तिक २६ गते । महा-पर्व छठका लागि काठमाडौँ उपत्यकाका विभिन्न नदी किनार, तलाउ तथा जलाशयहरूमा तयारी तीव्र पारिएको छ।

पछिल्ला वर्षहरूमा काठमाडौँमा छठ पर्व मनाउनेहरूको सङ्ख्या उल्लेख्य रूपमा बढ्दै गएका कारण यस वर्ष पनि विभिन्न १७ स्थानमा छठ घाट निर्माण, सरसफाइ तथा व्यवस्थापनको काम युद्धस्तरमा भइरहेको छ। विशेषगरी गौरीघाट, गुह्येश्वरी, कमलपोखरी, बागमती नदी किनार, टेकु र वंशीघाट लगायतका प्रमुख क्षेत्रहरूमा व्रतालुहरूका लागि आवश्यक पूर्वाधार तयार पार्ने काम अन्तिम चरणमा पुगेको सम्बन्धित आयोजक समितिहरूले जनाएका छन्।

चार दिनसम्म विभिन्न विधि र कठोर निष्ठाका साथ मनाइने यस पर्वमा नदी, पोखरी तथा जलाशयका किनारमा पुगेर अस्ताउँदो र उदाउँदो सूर्यलाई अर्घ दिई पूजा गर्ने परम्परा रहिआएको छ।

गौरीघाटस्थित छठ पूजा व्यवस्थापन समितिका अध्यक्ष अनिल सिंहका अनुसार गौरीघाटमा मात्रै ५५७ जना व्रतालुहरूले सहज रूपमा पूजा गर्न सक्ने गरी घाट निर्माण गरिएको छ। घाटमा आकर्षक पाल टाँग्ने, झिलीमिली बत्ती जडान गर्ने, नदी किनारको सरसफाइ गर्ने तथा आवश्यक अन्य पूर्वाधारहरू तयार पार्ने काम भइरहेको उहाँले जानकारी दिनुभयो।

काठमाडौँ उपत्यकामा गौरीघाट, गुह्येश्वरी क्षेत्र, कमलपोखरी, बागमती नदी किनारको थापाथली, टेकु, वंशीघाट, कुपण्डोल, बल्खु, विष्णुमती नदी किनार, नख्खु नदी किनार, तीनकुने दोभान, टङ्केश्वर, बोक्सीदह, कुलेश्वर, रामघाट तथा बालाजुस्थित बाइसधारा क्षेत्रलाई छठ पूजाका प्रमुख स्थलका रूपमा लिइएको छ।

काठमाडौँ महानगरपालिका लगायतका स्थानीय निकायहरूको समन्वयमा यी स्थलहरूमा घाट व्यवस्थापन तथा सुरक्षाको पुख्ता प्रबन्ध मिलाइएको छ।

यस वर्षको छठ पर्वअन्तर्गत कात्तिक २८ गते शनिबार ‘खरना’ विधि सम्पन्न गरिनेछ भने कात्तिक २९ गते आइतबार साँझ अस्ताउँदो सूर्यलाई पहिलो अर्घ दिएर पूजा आराधना गरिनेछ।

त्यसैगरी, कात्तिक ३० गते सोमबार बिहान उदाउँदो सूर्यलाई अर्घ दिएपछि चार दिन लामो यो पवित्र पर्वको औपचारिक समापन हुनेछ। तराई-मधेशमा मात्र सीमित नरही पछिल्लो समय काठमाडौँ उपत्यकासहित देशका विभिन्न पहाडी तथा हिमाली क्षेत्रमा समेत छठ पर्व व्यापक रूपमा विस्तार हुँदै गएको छ।