कतारमा जारी ‘आइटियू पिपि २६’ का अवसरमा सञ्चारमन्त्री डा. तिमिल्सिना र मलेसियाका समकक्षीबिच द्विपक्षीय भेटवार्ता

काठमाडौँ, कात्तिक २५ गते । कतारको दोहामा जारी अन्तर्राष्ट्रिय दूरसञ्चार संघको महासम्मेलन (आइटियू पिपि २६) को अवसरमा सूचना तथा सञ्चारमन्त्री डा. विक्रम तिमिल्सिना र मलेसियाका समकक्षी मन्त्रीबिच महत्त्वपूर्ण द्विपक्षीय भेटवार्ता भएको छ।

दुई देशबिचको सम्बन्धलाई अझ प्रगाढ बनाउँदै प्रविधि तथा दूरसञ्चार क्षेत्रमा सहकार्य गर्ने उद्देश्यले आयोजित सो भेटमा ५जी तथा स्याटेलाइट सञ्चार, सुलभ इन्टरनेट सेवा, डिजिटल साक्षरता, डाटा प्रोटेक्सन, डिजिटल सुरक्षा र युवा जनशक्ति विकासलगायतका समसामयिक विषयमा व्यापक छलफल भएको छ। भेटका क्रममा दुवै पक्षले आ-आफ्ना अनुभव आदानप्रदान गर्दै आगामी दिनमा साझेदारी बढाउने सम्भावनाबारे विचार विमर्श गरेका छन्।

सञ्चारमन्त्री डा. तिमिल्सिनाले नेपाल सरकारले हाल डिजिटल रूपान्तरण, दूरसञ्चार पहुँचको व्यापक विस्तार तथा सुरक्षित र समावेशी डिजिटल वातावरण निर्माणको कार्यलाई उच्च प्राथमिकतामा राखेर काम गरिरहेको स्पष्ट पार्नुभयो। यी विभिन्न प्राविधिक क्षेत्रमा मलेसियासँग सहकार्य गर्न नेपाल अत्यन्त उत्सुक रहेको उल्लेख गर्दै उहाँले मलेसियामा कार्यरत लाखौँ नेपाली नागरिकले त्यहाँको अर्थतन्त्र र समाजमा पुर्याएको योगदानको उच्च प्रशंसा गर्नुभयो।

साथै, नेपाली नागरिकप्रति मलेसिया सरकार र त्यहाँका जनताले देखाएको सदारभाव तथा आतिथ्यका लागि उहाँले विशेष आभारसमेत व्यक्त गर्नुभयो।

सो उच्चस्तरीय भेटवार्तामा नेपालतर्फबाट सूचना तथा सञ्चार मन्त्रालयका सचिव राजेन्द्रकुमार पौडेलसहित दुवै देशका प्रतिनिधिमण्डलका विशिष्ट सदस्यहरूको सक्रिय उपस्थिति रहेको थियो।

बैठकमा दुवै देशका प्रतिनिधिहरूले डिजिटल कनेक्टिभिटी, क्षमता विकास र डिजिटल विश्वासको क्षेत्रमा सहकार्यका ठोस तथा व्यावहारिक अवसरहरू पहिचान गर्दै आगामी दिनमा पनि यस्ता द्विपक्षीय संवाद र साझेदारीलाई निरन्तरता दिने सहमति जनाएका छन्।

यस भेटवार्ताले नेपाल र मलेसियाबिचको कूटनीतिक सम्बन्धलाई सुदृढ बनाउनुका साथै सूचना प्रविधि र डिजिटल अर्थतन्त्रको विकासमा दुवै देशलाई लाभान्वित गराउने विश्वास लिइएको छ।