नेपाल संवत् नेपालको मौलिक संवत् हो, यसले राष्ट्रिय एकता र पहिचान सुदृढ गर्छ : राष्ट्रपति पौडेल

काठमाडौँ, कात्तिक २४ गते । राष्ट्रपति रामचन्द्र पौडेलले राष्ट्रिय विभूति शङ्खधर साख्वाद्वारा प्रवर्तन गरिएको नेपाल संवत् नेपालको एक मौलिक संवत्का रूपमा रहेको बताउनुभएको छ।

नेपाल संवत् ११४७ को अवसरमा आज शुभकामना सन्देश जारी गर्दै उहाँले लिच्छवी राजा राघवदेवको समयमा काठमाडौँ उपत्यकामा रहेका गरिब तथा किसान जनतालाई ऋणमुक्त गरी शङ्खधरले नयाँ युगको सुरुवात गरेको ऐतिहासिक तथ्यको स्मरण गर्नुभएको छ।

नेपाली समाज सभ्य, सहिष्णु र एकताको सूत्रमा आबद्ध रहेको सन्दर्भमा यस्ता मौलिक परम्पराहरूले हाम्रो सभ्यता, इतिहास, स्वतन्त्रता र सांस्कृतिक पहिचानलाई अझ बढी सुदृढ बनाउँदै लगेको राष्ट्रपतिले उल्लेख गर्नुभएको छ।

काठमाडौँ उपत्यका लगायत देशका विभिन्न स्थानमा यस दिनलाई नयाँ संवत् सुरु हुने विशेष पर्वका रूपमा हर्षोल्लासपूर्वक मनाउने गरिएको छ। राष्ट्रिय विभूति साख्वाले जनताको आर्थिक मुक्ति, सामाजिक स्वतन्त्रता र परोपकारका क्षेत्रमा पुर्याउनुभएको योगदान सधैँ स्मरणीय रहने सन्देशमा उल्लेख गरिएको छ।

निःस्वार्थ भावले समाजमा समानता, सुशासन, उन्नति र प्रगतिको बाटोमा अग्रसर एवं प्रतिबद्ध रहन आजको यो विशेष दिनले सम्पूर्ण नेपालीलाई प्रेरणा प्रदान गर्ने विश्वास उहाँले व्यक्त गर्नुभएको छ।

राष्ट्रपति पौडेलले नेपाल संवत्ले देश तथा विदेशमा रहनुभएका सम्पूर्ण नेपालीबीच आपसी सद्भाव, सहिष्णुता र भाइचाराको भावना अभिवृद्धि गरी राष्ट्रिय एकतालाई अझ सुदृढ गर्न सकोस् भन्ने कामना गर्नुभएको छ। साथै, यस मौलिक संवत्ले नेपालको सार्वभौमिकता, स्वतन्त्रता, संस्कृति र राष्ट्रिय पहिचानलाई थप उचाइमा पुर्याउन मद्दत पुग्ने विश्वास उहाँले लिनुभएको छ।