नेपाल संवत्ले एकता, सहअस्तित्व र सामाजिक न्यायको मार्गमा अघि बढ्न प्रेरित गर्छ : मन्त्री विराजभक्त श्रेष्ठ

काठमाडौँ, कात्तिक २४ गते । ऊर्जा, जलस्रोत तथा सिँचाइ मन्त्री विराजभक्त श्रेष्ठले नेपाल संवत् ११४७ तथा म्हःपूजाका अवसरमा स्वदेश तथा विदेशमा रहनुभएका सम्पूर्ण नेपाली दाजु-भाइ तथा दिदी-बहिनीहरूमा सुख, शान्ति, सुस्वास्थ्य, एकता र समृद्धिको हार्दिक मङ्गलमय शुभकामना व्यक्त गर्नुभएको छ।

उहाँले नेपाल संवत् केवल क्यालेन्डर मात्र नभई यो नेपालको मौलिक इतिहास, सभ्यता, संस्कृति र राष्ट्रिय स्वाभिमानको एक जीवन्त प्रतीक भएको स्पष्ट पार्नुभएको छ। यसले हामीलाई सधैँ एकता, सहअस्तित्व, परोपकार र सामाजिक न्यायको मार्गमा अग्रसर हुन प्रेरित गर्ने उहाँको भनाइ छ।

नेपाल संवतका प्रवर्द्धक राष्ट्रिय विभूति शंखधर साख्वाले गरिब जनताको ऋण-मोचन गरेर समाज-सेवा, त्याग र लोक-कल्याणको जुन नजिर बसाल्नुभएको थियो, त्यसको महत्त्व आजको दिनमा पनि उत्तिकै प्रसाङ्गिक रहेको मन्त्री श्रेष्ठले औँल्याउनुभएको छ। उहाँले समाज र राष्ट्रप्रतिको जिम्मेवारी सधैँ व्यक्तिगत स्वार्थभन्दा माथि हुनुपर्ने उच्च आदर्श शंखधर साख्वाको योगदानले स्थापित गरेको उल्लेख गर्नुभएको छ।

देश अहिले सुशासन, आर्थिक समृद्धि, सामाजिक न्याय र सार्थक परिवर्तनको संवेदनशील तथा महत्त्वपूर्ण यात्रामा रहेको चर्चा गर्दै मन्त्री श्रेष्ठले यो यात्रालाई सफल बनाउन राज्यका सबै तह र निकायहरू थप जिम्मेवार, जवाफदेही र जन-उत्तरदायी बन्नुपर्नेमा जोड दिनुभएको छ। नागरिकको गहिरो विश्वास जित्ने, सबैलाई समान अवसरको सुनिश्चितता गर्ने र भावी सन्तति तथा पुस्ताका लागि एक समुन्नत राष्ट्र निर्माण गर्ने साझा दायित्व सबै नेपालीको भएको उहाँले प्रस्ट पार्नुभएको छ।

अन्तमा, नेपालको बहुभाषिक, बहु-सांस्कृतिक र बहु-जातीय विविधता नै हाम्रो वास्तविक राष्ट्रिय शक्ति भएको बताउँदै मन्त्री श्रेष्ठले भाषा, संस्कृति, सम्पदा र परम्पराको संरक्षणसँगै आपसी सद्भाव, राष्ट्रिय एकता र सहिष्णुतालाई थप प्रगाढ बनाउन आह्वान गर्नुभएको छ। यो नयाँ वर्षले सम्पूर्ण नेपालीमा नयाँ आशा, ऊर्जा र सकारात्मक सङ्कल्प सञ्चार गरोस् भन्ने कामना उहाँले गर्नुभएको छ।