तिहारको लक्ष्मीपूजाका दिन विद्युत्‌को पिक डिमान्ड करिब १७ सय मेगावाट पुग्ने अनुमान, आपूर्ति सहज रहने प्राधिकरणको दाबी

काठमाडौँ, कात्तिक २२ गते । उज्यालोको पर्व तिहारमा झिलिमिली बत्तीको प्रयोगसँगै यस वर्ष लक्ष्मीपूजाका दिन विद्युत्‌को अधिकतम माग (पिक डिमान्ड) करिब १७ सय मेगावाट पुग्ने अनुमान गरिएको छ।

नेपाल विद्युत् प्राधिकरणका अनुसार माग उच्च हुने भए तापनि आन्तरिक उत्पादन पर्याप्त रहेकाले विद्युत् आपूर्तिमा कुनै पनि प्रकारको अवरोध वा समस्या आउने छैन। गत वर्षको लक्ष्मीपूजाका दिन विद्युत्‌को उच्च माग १६५० मेगावाट पुगेको थियो भने क्रमिक रूपमा यसको खपत र माग दुवै बढ्दै गएको तथ्यांकले देखाएको छ।

कुनै समय तिहारजस्ता पर्वहरूमा १२ घण्टाभन्दा बढी लोडसेडिङ भोग्नुपरेको तीतो यथार्थलाई पछाडि पार्दै मुलुक अहिले विद्युत् निर्यात गर्ने सक्षम अवस्थामा पुगेको छ। २०७३ सालमा काठमाडौँ उपत्यकाबाट सुरु भएको लोडसेडिङमुक्त अभियान २०७५ सालमा देशैभरि कार्यान्वयनमा आएको थियो। प्राधिकरणका कार्यकारी निर्देशक दीर्घायुकुमार श्रेष्ठका अनुसार तिहारको अवधिमा आन्तरिक विद्युत् उत्पादन करिब २५ सय मेगावाट हुने प्रक्षेपण गरिएको हुँदा मागभन्दा उत्पादन धेरै बढी भई व्यवस्थापन पूर्ण रूपमा सहज बन्नेछ।

वितरण तथा ग्राहक निर्देशनालयका प्रमुख राजन ढकालले चाडपर्वका बेला धेरै बिजुली खपत गर्ने उद्योगहरू बन्द रहने हुनाले घरेलु माग धान्न थप सहज हुने बताउनुभएको छ। तिहार तथा छठ पर्वका अवसरमा उपभोक्तालाई निरन्तर र गुणस्तरीय विद्युत् प्रवाह गर्न प्राधिकरणले उच्च सतर्कता अपनाएको छ।

कार्यकारी निर्देशक श्रेष्ठको अध्यक्षतामा बसेको बैठकले प्रणालीको कडा निगरानी राख्न र कुनै पनि ट्रिपिङ वा लाइन जाने समस्या देखिएमा तत्काल समाधान गर्न २४ सै घण्टा ‘नो लाइट’ सेवा र मर्मतसम्भार टोलीलाई तयारी अवस्थामा राख्ने निर्णय गरेको छ।

देशभरका उपभोक्ताका गुनासाहरू तुरुन्त सम्बोधन गर्न प्राविधिक टोलीलाई कडा निर्देशन दिइएको हुँदा यस वर्षको तिहारमा उज्यालोको पर्व पूर्ण रूपमा निर्बाध र व्यवस्थित हुने विश्वास लिइएको छ।