तिहार नजिकिएसँगै नेपाली मौलिक बाजा मादलको बिक्री बढ्यो : दैनिक दर्जनौँ मादल बिक्री हुने

सुनसरी कात्तिक २१ गते । तिहार पर्व नजिकिएसँगै नेपालीहरूको मौलिक बाजा मादलको बिक्री सुनसरीमा ह्वात्तै बढेको छ। तिहारका बेला देउसी-भैलो खेल्ने सांस्कृतिक समूहहरूले मादललाई पहिलो प्राथमिकतामा राख्ने गरेका कारण यस समयमा यसको व्यापार अत्यधिक हुने गर्दछ।

आधुनिक प्रविधि र डिजिटल साउन्ड सिस्टमको प्रयोग बढे पनि नेपाली चाडपर्वमा मौलिकता बोकेको मादलप्रतिको मोह र आकर्षण जरा गाडेरै बसेको छ, जसले स्थानीय वाद्यवादन व्यवसायीहरूलाई उत्साहित बनाएको छ।

धरान–२ छाताचोकका साल्सा म्युजिक स्टोरका सञ्चालक सुमन चौधरीका अनुसार विगत २० वर्षदेखि सञ्चालन हुँदै आएको यस व्यवसायमा सामान्य समयमा दैनिक ५ देखि १० वटासम्म मादल बिक्री हुने गरेकामा तिहारको समयमा भने दैनिक ७० देखि ८० वटासम्म बिक्री हुने गरेको छ। आफ्नै कारखानामा मादल उत्पादन गरी भोजपुर, खाँदबारी, धनकुटा, उदयपुर लगायतका विभिन्न पहाडी तथा सहरी क्षेत्रमा आपूर्ति गर्दै आउनुभएका चौधरीले तीन हजारदेखि आठ हजार रुपियाँसम्मका मादल उपलब्ध गराउँदै आएको बताउनुभयो।

त्यसैगरी, धरानका अर्का व्यापारी यदुनाथ अधिकारी र इटहरी–६ का भेषराज अधिकारीले पनि तिहारको चहलपहलसँगै मादलको व्यापार उल्लेख्य बढेको अनुभव सुनाउनुभएको छ। भोजपुर, धनकुटा तथा पश्चिम नेपालबाट उत्पादित मादलहरू ल्याएर बिक्री गर्दै आउनुभएका उहाँहरूको पसलमा दुई हजारदेखि सात हजार रुपियाँसम्मका मादलहरू उपलब्ध छन्।

विशेषगरी देउसीभैलो खेल्ने समूहहरूले प्रयोगका लागि सहज र सुलभ मूल्यका मादलहरू बढी खोज्ने गरेका कारण लक्ष्मीपूजाको आसपासमा व्यापार अझ उचाइमा पुग्ने गरेको छ।

चाडपर्वको यो बेला स्थानीय स्तरमा मादलको कारोबार चलायमान बन्दा धेरैले रोजगारी पाएका छन् भने यसले नेपाली सांस्कृतिक परम्पराको जगेर्नामा समेत महत्त्वपूर्ण टेवा पुर्‍याएको छ।