एनपीएल : पोखरा एभेन्जर्समाथि चितवन राइनोजको ३० रनको जित, पोखराको प्ले अफ सम्भावना लगभग समाप्त !

काठमाडौं, कात्तिक २० गते । तेस्रो संस्करणको नेपाल प्रिमियर लिग (एनपीएल) टी–२० क्रिकेट प्रतियोगिताअन्तर्गत शुक्रबार भएको खेलमा चितवन राइनोजले पोखरा एभेन्जर्सलाई ३० रनले पराजित गर्दै अंक तालिकामा महत्वपूर्ण सुधार गरेको छ।

जितका लागि १ सय ५२ रनको लक्ष्य पछ्याएर मैदान उत्रिएको पोखरा १९ ओभरमा १ सय २१ रनमै अल-आउट भयो। पोखराका लागि अर्जुन कुमालले ४५ र युवराज सम्राले १९ रन बनाए पनि अन्य ब्याटरहरू चल्न सकेनन्। खराब लयमा रहेका कप्तान कुशल भुर्तेल पुनः असफल हुँदै ४ रनमा आउट भए भने यसै खेलबाट उनले कप्तानीसमेत गुमाएका छन्, जसको नेतृत्व चमिका करुनारत्नेले सम्हालेका थिए। चितवनका बलर रिजन ढकालले ४ र कमल ऐरीले ३ विकेट लिँदै पोखराको ब्याटिङ लाइन-अप ध्वस्त पारे।

यसअघि त्रिवि क्रिकेट मैदानमा टस हारेर पहिले ब्याटिङ गरेको चितवनले निर्धारित २० ओभरमा ६ विकेट गुमाउँदै १ सय ५१ रनको योगफल तयार पारेको थियो।

चितवनका लागि कप्तान सिकन्दर राजाले १६ बलमा ३७ रन र रवि बोपाराले २८ बलमा ३५ रनको आक्रामक पारी खेल्दै पाँचौं विकेटका लागि ६० रनको महत्वपूर्ण साझेदारी गरेका थिए। यस्तै, अर्जुन साउदले ३१ र डाविड मालनले २८ रन जोड्दै राम्रो सुरुवात दिलाएका थिए। पोखराका बलरहरू चमिका करुनारत्ने, विपिन खत्री र कुशल भुर्तेलले समान २–२ विकेट हात पारे।

यो जितसँगै चितवन ५ अंकसहित प्रतियोगिताको तेस्रो स्थानमा उक्लिएको छ भने पोखरा भने अहिलेसम्म खाता खोल्न नसकि अंकतालिकाको पुछारमा रहँदै प्ले अफमा पुग्ने सम्भावना लगभग समाप्त भएको छ।