एनपीएल : विराटनगरमाथि काठमान्डु गोर्खाजको ९ विकेटको प्रभावशाली जित : अंक तालिकामा सातौंबाट दोस्रो स्थानमा उक्लियो

काठमाडौँ, कात्तिक १९ गते । नेपाल प्रिमियर लिग (एनपीएल) क्रिकेटमा काठमान्डु गोर्खाजले उत्कृष्ट प्रदर्शन गर्दै बिहीबार विराटनगर किंग्समाथि ९ विकेटको सानदार र प्रभावशाली विजय हासिल गरेको छ।

टस हारेर पहिले ब्याटिङको निम्तो पाएको विराटनगरले खराब ब्याटिङ प्रदर्शनका कारण १८.३ ओभरमा आफ्ना सबै विकेट गुमाउँदै मात्र ८३ रनको सामान्य योेगफल तयार पारेको थियो। जवाफमा सानो लक्ष्य पछ्याएको काठमान्डुले विस्फोटक ब्याटिङ गर्दै मात्र ९.४ ओभरमा १ विकेटको क्षतिमा ८६ रन बनाउँदै सहज जित निकाल्यो।

यो लगातार दोस्रो जितसँगै काठमान्डु अंक तालिकामा सातौँ स्थानबाट सीधा दोस्रो स्थानमा उक्लिएको छ भने पराजित विराटनगर दोस्रोबाट पाँचौँ स्थानमा झरेको छ।

सामान्य लक्ष्य पछ्याउने क्रममा काठमान्डुले पहिलो ओभरमै १४ रन जोडेर आक्रामक सुरुवात गरेको थियो। साहिल पटेल १० रनमा आउट भए पनि त्यसपछि स्टार ब्याटर डेभिड वार्नर र विल बोसिस्टोले दोस्रो विकेटका लागि ६९ रनको अविजित साझेदारी गर्दै टिमलाई सहजै जिताए। वार्नरले २४ बलमा २ चौका र ३ छक्कासहित सर्वाधिक ४४ रन बनाए भने बोसिस्टोले २३ रन जोडे। वार्नरले लगातार दुई छक्का प्रहार गर्दै विजयी रन बटुलेका थिए।

यसअघि ब्याटिङ गरेको विराटनगरले ३५ रनमै ७ विकेट गुमाउँदै एनपीएलकै न्यून स्कोरको कीर्तिमान बन्ने खतरामा पुगेको थियो। तर, एन्जेलो म्याथ्युज (२२ रन) र रुपेश सिंह (सर्वाधिक २६ रन) ले आठौं विकेटका लागि ३९ रनको महत्वपूर्ण साझेदारी गर्दै टिमलाई सम्मानजनक स्थितिमा पुर्‍याएका थिए। काठमान्डुका बलरहरूले उत्कृष्ट प्रदर्शन गर्ने क्रममा सन्तोष यादवले ३ विकेट लिए भने सहन अराचिगे र जाहन्दद खानले २–२ विकेट हात पारे।

काठमान्डु गोर्खाजको यो उच्च मनोबलले टोलीको आगामी यात्रालाई थप बलियो बनाएको छ भने विराटनगरले आफ्ना ब्याटिङ कमजोरीहरूमा गम्भीर समीक्षा गर्नुपर्ने अवस्था देखिएको छ।