मुस्ताङको पर्यटन पुरानो लयमा: मङ्गलबार एकैदिन ३ हजार ८०० पर्यटक प्रवेश

मुस्ताङ, कात्तिक १९ गते । प्राकृतिक विपत्तिका कारण केही समय सुस्ताएको मुस्ताङको पर्यटन क्षेत्र बिस्तारै आफ्नो पुरानो लयमा फर्कन थालेको छ। यसअघि रसुवा, भोटेकोशी र कालीगण्डकीमा आएको बाढी तथा पछिल्लो समयको हिमपात र वर्षाले गर्दा मुस्ताङ आउने आन्तरिक तथा बाह्य पर्यटकको सङ्ख्या ह्वात्तै घटेको थियो।

भदौ महिनादेखि नै पर्यटकको चहलपहल न्यून रहेको यस क्षेत्रमा मङ्गलबार मात्रै एकैदिन तीन हजार आठ सय पर्यटक प्रवेश गरेसँगै पर्यटन क्षेत्रमा उत्साह छाएको छ। कात्तिकको पहिलो सातासम्म दैनिक दुई हजारभन्दा कम पर्यटक भित्रिने गरेका थिए भने मौसममा आएको सुधार र सडक सञ्जालको सहजताले अब आवागमनमा सुधार आएको छ।

विशेष गरी रसुवा र भोटेकोशीको बाढीपछि घटेको भारतीय पर्यटकको आगमन अहिले पुनः बढ्दै गएको छ। मुस्ताङ भित्रिने अधिकांश पर्यटकहरू प्रख्यात धार्मिक स्थल मुक्तिनाथ दर्शनका लागि जाने गरेको मन्दिर व्यवस्थापन समितिका प्रमुख दिनेश भुसालले जानकारी दिनुभएको छ।

घाँसा र छुसाङस्थित प्रहरी चेकपोस्टमा पर्यटकहरूको तथ्याङ्क सङ्कलन हुने गरेको छ। प्राकृतिक विपत्तिले थला पारेको पर्यटन र कृषि क्षेत्रलाई उकास्न सरकारले विशेष अभियान सञ्चालन गर्नुपर्ने मुस्ताङ उद्योग वाणिज्य सङ्घका अध्यक्ष राजु लालचनले माग गर्नुभएको छ। विपद्का कारण समयमै स्याउ बजारमा पुग्न नसकेको र अर्धनिषेधित क्षेत्रको सीमाका कारण पर्यटकहरूलाई केही असहजता भएकोले त्यसमा सुधार गर्नुपर्ने उहाँको भनाइ छ।

उपल्लो मुस्ताङका लोघेकर दामोदरकुण्ड र ल्होमन्थाङ जाने विदेशी पर्यटकले ५० डलर शुल्क तिर्नुपर्ने व्यवस्था छ भने भारतीय पर्यटकहरू भने तल्लो क्षेत्रबाटै फर्कने गरेका छन्।

पर्यटन क्षेत्रको पुनरुत्थानले मुस्ताङको स्थानीय अर्थतन्त्रलाई फेरि सबल बनाउन र रोजगारीका अवसरहरू सिर्जना गर्न महत्त्वपूर्ण भूमिका खेल्ने विश्वास लिइएको छ।