बन्दीपुरमा पर्यटक: होटल तथा पर्यटकीय स्थलहरूमा चहल-पहल बढ्यो

तनहुँ, कात्तिक ८ गते । दसैँ र तिहारबिचको लामो बिदाको अवसर पारेर घुमफिर गर्न निस्कने आन्तरिक पर्यटकहरूको प्रमुख रोजाइमा तनहुँको प्रसिद्ध पर्यटकीय नगरी बन्दीपुर पर्न सफल भएको छ।

चाडपर्वको चहलपहल सकिएलगत्तै परिवार र साथीभाइसँग छोटो भ्रमणका लागि निस्कने पर्यटकहरू बढेसँगै बन्दीपुरका मुख्य बजार, होटल तथा आसपासका पर्यटकीय स्थलहरूमा रौनक छाएको छ। बन्दीपुर पर्यटन विकास समितिका पूर्वअध्यक्ष बैसबहादुर गुरुङका अनुसार यस किसिमको लामो बिदाले आन्तरिक पर्यटकको सङ्ख्यामा उल्लेख्य वृद्धि गरेको छ भने ‘भिजिट बन्दीपुर २०२५’ अभियानको प्रभावले विदेशी पर्यटकलाई समेत आकर्षित गर्न ठूलो सहयोग पुगेको छ।

बन्दीपुरका परम्परागत नेवारी शैलीका घरहरू, ढुङ्गा छापिएका सफा सडकहरू, शान्त वातावरण र उत्तरतर्फका हिमशृङ्खलाहरूको मनमोहक दृश्यावलोकन यहाँका मुख्य विशेषता हुन्। बन्दीपुर सामुदायिक होमस्टेका पूर्वअध्यक्ष राजु बानियाँका अनुसार बजारका पुराना गल्लीहरूमा पैदल घुम्ने, स्थानीय परिकारहरूको स्वाद लिने र मौलिक बस्तीको रहनसहन बुझ्ने अवसरले पर्यटकहरूलाई बन्दीपुरतर्फ खिच्ने गरेको छ। पर्यटकीय यामको सुरुवातसँगै विदेशी पर्यटकहरूको आगमन पनि उल्लेखनीय रूपमा बढ्दै गएको स्थानीय व्यवसायीहरूले बताएका छन्।

बन्दीपुर बजार मात्र नभई यहाँका खड्गदेवी मन्दिर, थानीमाई, रानीवन, ऐतिहासिक रामकोट गाउँ र एसियाकै ठूलोमध्ये एक मानिने प्रसिद्ध सिद्धगुफा लगायतका स्थलहरूमा पनि पर्यटकहरूको बाक्लो चहलपहल देखिएको बन्दीपुर गाउँपालिकाका अध्यक्ष सुरेन्द्रबहादुर थापाले जानकारी दिएका छन्।

गाउँपालिकाले बन्दीपुरको प्राकृतिक सौन्दर्य, मौलिक संस्कृति र ग्रामीण जीवनशैलीलाई पर्यटनसँग जोडेर प्रभावकारी रूपमा प्रचारप्रसार गर्दै आएको छ। यहाँको अद्वितीय संस्कृति र आतिथ्यताले गर्दा पर्यटकहरूको बसाइ लम्बिने गरेको र यसले स्थानीय अर्थतन्त्रलाई चलायमान बनाएको छ।