दसैँको १४ दिनमा मापसे र लापसे सेवन गरी सवारी चलाउने १ हजार ३७ चालक कारबाहीमा

काठमाडौँ, कात्तिक ७ गते । दसैँको अवधिमा काठमाडौँ उपत्यकामा मादक पदार्थ तथा लागुपदार्थ सेवन (मापसे तथा लापसे) गरी सवारीसाधन चलाउने एक हजार ३७ जना चालक कारबाहीमा परेका छन्।

काठमाडौँ उपत्यका ट्राफिक प्रहरी कार्यालयका अनुसार घटस्थापनादेखि कात्तिक ७ गतेसम्मको १४ दिनको अवधिमा मापसे गरेर सवारी चलाउने एक हजार दुई जना र लागुपदार्थ सेवन गरी चलाउने ३५ जना चालकहरूलाई नियन्त्रणमा लिई कारबाही गरिएको हो। चाडपर्वका बेला यात्रु तथा यातायातको चाप अत्यधिक हुने हुनाले सम्भावित दुर्घटनाको जोखिमलाई ध्यानमा राख्दै प्रहरीले उपत्यकाका विभिन्न स्थानमा निगरानी तथा चेकजाँचलाई तीब्र बनाएको छ।

कार्यालयका प्रमुख एवं प्रहरी वरिष्ठ उपरीक्षक सुरेशप्रसाद काफ्लेका अनुसार मापसे कारबाहीमा परेका एक हजार दुई जनामध्ये ५९ जना सार्वजनिक सवारीसाधनका चालक रहेका छन् भने लापसे कारबाहीमा परेका ३५ जना नै सार्वजनिक यातायातका चालक रहेका छन्।

सार्वजनिक सवारीका चालकहरू नै यसरी जिम्मेवारीविहीन भई कुलतमा सवारी चलाउँदा यात्रुको जीवन थप जोखिममा पर्ने भएकाले ट्राफिक प्रहरीले यस प्रकारका लापरबाहीविरुद्ध कडा कदम चालेको हो। सवारी तथा यातायात व्यवस्था ऐन, २०४९ तथा प्रचलित कानुनी व्यवस्था बमोजिम उनीहरूमाथि कारबाही गरिएको छ।

चाडपर्वको समयमा सुरक्षित र मर्यादित यात्राको सुनिश्चितता गर्न ट्राफिक प्रहरीले चालकहरूलाई कुनै पनि प्रकारको नशालु पदार्थ सेवन नगर्न, निर्धारित गतिसीमा पालना गर्न र यातायात नियम पूर्ण रूपमा मान्न विशेष आग्रह गरेको छ। दुर्घटना न्यूनीकरणका लागि यस्ता नियमित तथा छड्के जाँचहरू आगामी दिनमा पनि निरन्तर जारी रहने ट्राफिक प्रहरी कार्यालयले जनाएको छ।