नेकपाद्वारा राष्ट्रिय जागरण अभियान सुरु, जनताका घरदैलोमा पुग्दै गुनासा र समस्या सुन्ने

काठमाडौँ, कात्तिक ७ गते । नेपाली कम्युनिष्ट पार्टी (नेकपा) ले राष्ट्रिय स्वाधीनता रक्षा, लोकतन्त्र र जन-अधिकारको संरक्षण, पार्टी रूपान्तरण तथा समाजवाद निर्माणका आधार तयार पार्ने मुख्य उद्देश्यसहित आजदेखि ‘राष्ट्रिय जागरण अभियान’ सुरु गरेको छ।

आगामी मङ्सिर २५ गतेसम्म सञ्चालन हुने यस अभियानमार्फत किसान, श्रमजीवी, मजदुर, युवा, विद्यार्थी, महिला, दलित, आदिवासी जन-जाति, मधेसी तथा व्यवसायीहरूसँग प्रत्यक्ष संवाद गरिने नेकपाका संयोजक पुष्पकमल दाहाल ‘प्रचण्ड’ ले जानकारी दिएका छन्।

अभियानको घोषणा गर्दै संयोजक दाहालले पार्टीका केन्द्रीय नेताहरूको नेतृत्वमा गाउँ, वडा र टोल-टोलसम्म पुगेर आम जनताका समस्या, गुनासा, सुझाव र आलोचनाहरू सुन्ने बताएका छन्। देशमा विद्यमान महँगी, बेरोजगारी, कालोबजारी, भ्रष्टाचार, आर्थिक असुरक्षा, सार्वजनिक सेवामा हुने ढिलासुस्ती तथा सुकुमवासी र श्रमिकका समस्याहरूबारे जनतासँगको अन्तरक्रियाबाटै वास्तविक तथ्य र अनुभव सङ्कलन गरिने उनले स्पष्ट पारे।

तल्लो तहसम्म जनताका पीरमार्का बुझ्ने र जनतासँगको सम्बन्धलाई थप सुदृढ बनाउने यस अभियानले पार्टीलाई जनपक्षीय रूपान्तरणतर्फ डोर्याउने विश्वास लिइएको छ। सरकार र राजनीतिक दलहरूप्रति जनताको चासो बढेको बेला सञ्चालन भएको यो अभियानले राष्ट्रिय राजनीतिमा महत्त्वपूर्ण प्रभाव पार्ने अपेक्षा गरिएको छ।