मुस्ताङमा बढ्यो पर्यटकीय चहलपहल : दसैँपछि दुई दिनमै भित्रिए साढे सात हजारभन्दा बढी पर्यटक

मुस्ताङ, कात्तिक ७ गते । बाढीपहिरो र नदी कटानका कारण केही समय सुनसान बनेको हिमाली जिल्ला मुस्ताङमा दसैँ सुरु भएलगत्तै पर्यटकीय चहलपहल तीव्र रूपमा बढ्न थालेको छ।

रसुवाको भोटेकोशीमा आएको बाढी र असोज ११ गतेको भारी वर्षाले बेनी–जोमसोम सडकमार्ग पूर्ण रूपमा अवरुद्ध हुँदा यहाँको पर्यटन व्यवसाय पूर्ण रूपमा प्रभावित बनेको थियो। तर, सडक मर्मत गरेर यातायात सुचारु भएपछि जिल्ला प्रहरी कार्यालय मुस्ताङको तथ्याङ्क अनुसार दसैँको टीकापछिको दुई दिन (बिहीबार र शुक्रबार मात्र) सात हजार आठ सय ४६ जना स्वदेशी तथा विदेशी पर्यटक मुस्ताङ भित्रिएका छन्।

प्रहरी निरीक्षक एवं सूचना अधिकारी ईश्वर महतका अनुसार यसअघि घटस्थापनादेखि विजया दशमीको दिनसम्मको १० दिनको अवधिमा पाँच हजार छ सय ६३ जना पर्यटक मुस्ताङ आएका थिए, जसमध्ये ७७ प्रतिशतभन्दा बढी (चार हजार चार सय ९९ जना) विदेशी पर्यटक रहेका थिए। चाडपर्वको विदामा विदेशबाट स्वदेश फर्किएका नागरिक, निजामती कर्मचारी, बैंक तथा वित्तीय संस्थाका कर्मचारीहरूसँगै ठूलो संख्यामा आन्तरिक पर्यटकहरू मुस्ताङ पुगेका छन्। चालु आर्थिक वर्षको साउनमा ३० हजार ५३४, भदौमा २० हजार २६८ र असोजमा १८ हजार ६०१ जना पर्यटक मुस्ताङ भित्रिएका थिए।

मुस्ताङमा रहेका मुक्तिनाथ मन्दिर, कोरला नाका, लोमान्थाङ दरबार, झोङ गुफा, ढुम्बा ताल र टिटी ताल लगायतका ऐतिहासिक तथा धार्मिक स्थलहरू पर्यटकका प्रमुख आकर्षणका केन्द्र हुन्। यहाँको अनुपम हिमाली भू–दृश्य, प्राकृतिक सौन्दर्य र सांस्कृतिक सम्पदाले पर्यटकहरूलाई आकर्षित गर्ने गरेको छ। दसैँ, तिहार तथा छठ पर्वसम्म पर्यटन व्यवसाय अझै चलायमान हुनेमा यहाँका स्थानीय पर्यटन व्यवसायीहरू अत्यधिक विश्वस्त रहेका छन्।