सौराहामा आन्तरिक पर्यटकको चहलपहल कम, विदेशी पर्यटक भने उत्साहजनक

काठमाडौँ, कात्तिक ६ गते । भोटेकोशी र बुढीगण्डकीमा आएको बाढीपछि मुख्य राजमार्गको अवरोध हटे पनि सम्भावित त्रासका कारण यस वर्षको दसैँमा आन्तरिक पर्यटकको चहलपहल उल्लेख्य रूपमा घटेको छ।

अघिल्ला वर्षहरूमा दसैँ बिदाको समयमा पर्यटकीय गन्तव्यहरूमा ठूलो भीडभाड हुने गरे पनि यसपटक भने सौराहा लगायतका प्रमुख क्षेत्रहरूमा आन्तरिक पर्यटकको उपस्थिति न्यून देखिएको छ। क्षेत्रीय होटल सङ्घ चितवनका अध्यक्ष ओमप्रकाश पाण्डेका अनुसार होटलहरूमा आन्तरिक पर्यटकको बुकिङतर्फ उत्साह नदेखिए पनि अबका दिनमा क्रमशः पर्यटक बढ्नेमा व्यवसायीहरू आशावादी छन्।

स्वदेशी पर्यटकको बुकिङ कमजोर रहे पनि विदेशी पर्यटकहरूको आगमनले भने पर्यटन व्यवसायीहरूलाई केही राहत प्रदान गरेको छ। वनबास रिसोर्टका महाप्रबन्धक प्रकाश न्यौपानेका अनुसार गएका केही दिनदेखि उनको होटल जर्मनी, डेनमार्क, बेल्जियम, अस्ट्रेलिया र अमेरिकाका विदेशी पर्यटकहरूले भरिएको छ। यसैगरी, अन्य होटलहरूमा पनि भारतीय तथा बाह्य देशका पर्यटकहरूबाट सोधपुछ र बुकिङ आउन थालेको व्यवसायीहरूले बताएका छन्।

देशकै तेस्रो प्रमुख पर्यटकीय गन्तव्य तथा सफारी पर्यटनका लागि प्रख्यात सौराहामा चितवन राष्ट्रिय निकुञ्ज घुम्न, एकसिङ्गे गैँडा तथा पाटेबाघ हेर्न र थारू संस्कृति अवलोकन गर्न पर्यटकहरू आउने गर्छन्। बाढीका कारण रोकिएका बुकिङहरू क्रमशः पुनः हुन थालेकाले दसैँका बाँकी दिनहरू र आगामी सिजनमा पर्यटकको संख्या थप बढ्ने र पर्यटन व्यवसाय सहज बन्नेमा व्यवसायीहरू विश्वस्त रहेका छन्।