मनास्लु संरक्षण क्षेत्रमा क्यूआर कोड प्रणाली सुरु: पर्यटकले चेकपोस्टमा घण्टौँ कुर्नुपर्ने बाध्यता हट्यो

गोरखा, असोज २३ गते । उत्तरी गोरखाको मनास्लु संरक्षण क्षेत्रमा भ्रमणका लागि आउने विदेशी तथा आन्तरिक पर्यटकको प्रवेश र प्रस्थानको विवरण अद्यावधिक गर्न ‘क्यूआर कोड‘ (QR Code) प्रणाली कार्यान्वयनमा ल्याइएको छ।

पर्यटकको विवरण प्रविष्टि प्रक्रियालाई आधुनिक, छिटो र व्यवस्थित बनाउने उद्देश्यले मनास्लु संरक्षण क्षेत्र आयोजना (एमक्याप) ले यो प्रविधि सुरु गरेको हो।

आयोजनाका सूचना अधिकारी भुवनराज ओझाका अनुसार मनास्लु क्षेत्रको प्रवेश अनुमति (Permit) लिने क्रममै पर्यटकलाई क्यूआर कोड उपलब्ध गराइनेछ। चेकपोस्टमा सो कोड स्क्यान गर्नासाथ पर्यटकको विवरण राष्ट्रिय प्रकृति संरक्षण कोषको मोबाइल एपमा स्वतः अद्यावधिक हुनेछ।

यसअघि हातैले नाम, राहदानी र भिसा नम्बर लेखेर अभिलेख राख्दा एक जना पर्यटकका लागि ४ देखि ५ मिनेट लाग्ने र मुख्य सिजनमा डेढदेखि दुई घण्टासम्म कुर्नुपर्ने बाध्यता थियो।

मनास्लु क्षेत्रका सामागाउँ, साम्दो र छेकम्पारजस्ता दुर्गम क्षेत्रमा फोरजी (4G) इन्टरनेट सेवा विस्तार भएपछि यो प्रविधि लागू गर्न सम्भव भएको हो। इन्टरनेट सेवा अवरुद्ध भएको अवस्थामा पनि अफलाइन क्यूआर स्क्यान गर्न सकिने र पछि नेट आउनासाथ विवरण स्वतः सर्भरमा सिङ्क (Update) हुने व्यवस्था मिलाइएको एमक्याप गोरखाले जनाएको छ।

असोज–कात्तिक मनास्लु क्षेत्रको मुख्य पर्यटकीय सिजन भएकाले हाल दैनिक करिब ३०० जना पर्यटक मनास्लु पदमार्गमा प्रवेश गरिरहेका छन्। नयाँ प्रणालीको सुरुवातसँगै चेकपोस्टमा हुने अस्वाभाविक भीड र लामो प्रतीक्षाको अन्त्य हुनुका साथै तथ्याङ्क सङ्कलन तथा अभिलेखीकरण थप पारदर्शी र व्यवस्थित बन्ने अपेक्षा गरिएको छ।