11/22/2026, 18:34:06
आइतबार, मङि्सर ०७, २०८३

सडक सञ्जाल र प्रचारसँगै बढ्यो पाँचथरको चाररातेमा पर्यटकको चहल-पहल

दैनिक ३०० देखि ५०० आन्तरिक तथा बाह्य पर्यटकको आगमन; कञ्चनजङ्घा, कुम्भकर्ण र सूर्योदय–सूर्यास्तको दृश्यावलोकन मुख्य आकर्षण


पाँचथर, मङ्सिर ६ गते । पाँचथरको फालेलुङ गाउँपालिका–४ स्थित चारराते क्षेत्रमा सहज सडक सञ्जाल र बढ्दो प्रचार-प्रसारसँगै आन्तरिक तथा बाह्य पर्यटकको आगमन बढ्न थालेको छ ।

फालेलुङ कञ्चनजङ्घा पर्यापर्यटन प्रवर्द्धन संस्थाका अध्यक्ष शिल्प साम्पाङ राईका अनुसार नेपाल–भारत सीमावर्ती क्षेत्र चाररातेमा अहिले दैनिक ३०० देखि ५०० जनासम्म पर्यटक पुग्ने गरेका छन् ।

PHOTO CREDITS: Smriti-Rai-Ghumante
PHOTO CREDITS: Smriti-Rai-Ghumante

समुन्द्र सतहदेखि ३,५०० मिटर उचाइमा रहेको चाररातेबाट कञ्चनजङ्घा र कुम्भकर्णसहित नेपाल, सिक्किम र भुटानका हिम-शृङ्खला, सूर्योदय तथा सूर्यास्तको मनोरम दृश्य र चौँरी–भेँडीगोठको अनुभव लिन सकिन्छ । यहाँ छायाङ्कन भएको ‘उनको स्वीटर’ चलचित्र, चौँरी महोत्सव, सामाजिक सञ्जालको प्रचार तथा झण्डा पोखरी, जलजले पोखरी र भैँसे पोखरीले पनि पर्यटक तानिरहेको घरबास सञ्चालक डिल्लीहाङ केरुङले बताउनुभयो ।

पाँचथरको फिदिमबाट प्राङबुङ हुँदै र इलामको सन्दकपुरबाट समेत दुईपाङ्ग्रे तथा चारपाङ्ग्रे सवारीमा पुग्न सकिने भएपछि कात्तिक–मङ्सिरको उपयुक्त याममा पर्यटकको चाप बढेको हो । भारततर्फबाट आउने पर्यटकको कम्तीमा आधा हिस्सा नेपालतर्फबाट भित्र्याउन सके जिल्ला सदरमुकामसहितका बजारको अर्थतन्त्र र स्वरोजगारमा टेवा पुग्ने अध्यक्ष राईको भनाइ छ ।

पर्यटकको सङ्ख्या बढे पनि सीमित घरबास र गोठबास, खानेपानी तथा विद्युत्को अनियमितता र वर्षामा सडक जोखिमपूर्ण हुने भएकाले व्यवस्थापनमा चुनौती रहेको सञ्चालक केरुङले उल्लेख गर्नुभयो ।

विषय / क्षेत्र मुख्य विवरण वा सार
अवस्थिति र उचाइ फालेलुङ गाउँपालिका–४, पाँचथर; समुन्द्र सतहबाट ३,५०० मिटर उचाइ; फिदिम–प्राङबुङ र सन्दकपुर मार्गबाट पहुँच ।
पर्यटक र आकर्षण दैनिक ३००–५०० पर्यटक; कञ्चनजङ्घा, कुम्भकर्ण, सूर्योदय–सूर्यास्त, चौँरी/भेँडीगोठ, झण्डा/जलजले/भैँसे पोखरी र ‘उनको स्वीटर’ छायाङ्कन ।
आर्थिक अवसर र चुनौती पर्यटन अर्थतन्त्र र स्वरोजगारको सम्भावना; तर सीमित घरबास, खानेपानी/विद्युत् अनियमितता र सडक जोखिमको चुनौती ।