अन्नपूर्ण आधार शिविर र मौरिस हर्जोग पदमार्गमा पर्यटकको घुइँचो : व्यवसायी उत्साहित

म्याग्दी, कात्तिक २९ गते । तिहार, छठ पर्व तथा नियमित सार्वजनिक बिदाका कारण परेको लामो बिदाले म्याग्दीको अन्नपूर्ण गाउँपालिका–४, नारच्याङस्थित चार हजार ५० मिटरको उचाइमा रहेको अन्नपूर्ण प्रथम हिमालको आधार शिविर र मौरिस हर्जोग पदमार्गमा पर्यटकको अभूतपूर्व चहलपहल बढेको छ।

भदौ र असोज महिनामा आएको बाढी-पहिरोका कारण केही कमी आए पनि दसैँ–तिहार र छठको बिदाले गर्दा पछिल्लो समय यो क्षेत्र युवा पुस्ताको प्रमुख पदयात्रा रोजाइमा पर्दै गएको छ। यसले गर्दा स्थानीय होटल, रेस्टुरेन्ट तथा यातायात व्यवसायीहरू अत्यन्तै उत्साहित भएका छन्।

मौरिस हर्जोग पदमार्गका अभियन्ता तेज गुरुङका अनुसार तिहारपछि दैनिक रूपमा चार सयदेखि पाँच सयको हाराहारीमा पर्यटकहरू आधार शिविरको भ्रमणमा निस्किने गरेका छन्। हुमखोला, फुतफुते झरना, साँधीखर्क, गुफाफाँट, भुस्केटमेला र आधार शिविर क्षेत्रका होटल तथा टी–सपहरू पूर्ण रूपमा भरिभराउ भएका छन् भने यसको सकारात्मक प्रभाव बेनी, भुरुङ–तातोपानी र नारच्याङका बजारहरूमा पनि देखिएको छ।

पर्यटकहरूले पदमार्गमा रहेका पञ्चकुण्ड ताल, फुतफुते झरना र नजिकैबाट अवलोकन गर्न पाइने हिमालको मनोरम दृश्यले आफ्नो यात्रा अत्यन्तै रोमाञ्चक र स्वर्गको अनुभूति गराएको प्रतिक्रिया दिएका छन्।

पर्यटकहरूको बढ्दो आगमनलाई मध्यनजर गर्दै गाउँपालिका तथा विभिन्न तहका सरकारको सहयोगमा पदमार्गमा अस्थायी होटल, चिया पसल, आश्रयस्थल, खानेपानी र शौचालय जस्ता पूर्वाधारहरूको विकास गरिएको छ।

साथै, पहिलो सफल आरोही मौरिस हर्जोग, लुइस लचेनल र नेपाली सहयोगी सोनाम वाङ्चुक शेर्पाको सालिकसहित खुला सङ्ग्रहालय समेत स्थापना गरिएको छ। नारच्याङको हुमखोलासम्म गाडीमा पुगेर त्यहाँबाट करिब २१ किलोमिटरको पैदलमार्ग तय गरेर पर्यटकहरू अन्नपूर्ण आधार शिविर पुग्ने गर्दछन्।

यस किसिमको पर्यटन प्रवर्धनले स्थानीयस्तरमा रोजगारीका अवसरहरू सिर्जना गर्नुका साथै समग्र गण्डकी प्रदेशको ग्रामीण पर्यटन विकासमा महत्त्वपूर्ण योगदान पुर्‍याइरहेको छ।