बाढीका कारण नेपाल टेलिकमको आम्दानी प्रभावित : पहिलो त्रैमासिकमा खुद नाफा भने ३७ प्रतिशतभन्दा बढीले वृद्धि

काठमाडौँ, कात्तिक २९ गते । गत भदौ र असोज महिनामा रसुवाको भोटेकोशी र बुढीगण्डकी नदीमा आएको विनाशकारी बाढीको नकारात्मक असर नेपाल टेलिकमको वित्तीय विवरण तथा व्यावसायिक गतिविधिमा समेत देखिएको छ।

बाढीले प्रभावित क्षेत्रमा टेलिकमका पूर्वाधारहरूमा क्षति पुर्‍याउँदा सेवा अवरुद्ध भएको र त्यसले व्यापारमा असर पारेको कम्पनीले सार्वजनिक गरेको चालु आर्थिक वर्ष २०८३/८४ को पहिलो त्रैमासिक (साउन–असोज) को अपरिष्कृत वित्तीय विवरणमा उल्लेख गरिएको छ। आपतकालीन समयमा प्रभावित क्षेत्रका स्थानीय बासिन्दालाई कम्पनीले तीन हप्तासम्म निःशुल्क भ्वाइस तथा डेटा सेवा समेत उपलब्ध गराएको थियो।

बाढी र प्राकृतिक विपत्तिकै कारण आम्दानीमा केही प्रतिकूल असर परे पनि समीक्षा अवधिमा टेलिकमको कुल आम्दानी र खुद नाफामा भने सकारात्मक सुधार देखिएको छ। यस तीन महिनाको अवधिमा कम्पनीले ८ अर्ब ६७ करोड रुपियाँ सञ्चालन आय र ९ अर्ब ४७ करोड रुपियाँ कुल आम्दानी गर्न सफल भएको छ।

गत वर्षको सोही अवधिको तुलनामा सञ्चालन आय सामान्य बढेको भए पनि ब्याज, कर तथा ह्रासअघिको आम्दानी भने २९ करोड १४ लाख रुपियाँले घटेर ४ अर्ब ४५ करोड रुपियाँमा सीमित भएको छ।

यद्यपि, कम्पनीको करअघिको नाफा ३.६५ प्रतिशतले बढेर २ अर्ब ९८ करोड रुपियाँ पुगेको छ भने खुद नाफामा ३७.३५ प्रतिशत अर्थात् ४९ करोड ४९ लाख रुपियाँभन्दा बढीको आकर्षक वृद्धि हासिल हुँदै १ अर्ब ३२ करोड रुपियाँ खुद नाफा आर्जन भएको छ। दुर्गम तथा विकट स्थानहरूमा समेत उच्च लागतका बाबजुद सेवा विस्तार र गुणस्तर सुधारलाई निरन्तरता दिँदै आएको कम्पनीले जनाएको छ।

प्राकृतिक विपद् र विषम परिस्थितिका बाबजुद टेलिकमले वित्तीय सूचकहरूलाई सन्तोषजनक स्थितिमा राख्न सफल भएको यस विवरणबाट स्पष्ट हुन्छ।