सुनकोशी–मरिण डाइभर्सन आयोजनाको ठेक्का प्रक्रिया संशोधित ऐन तथा नियमावलीअनुसार तत्काल सुरु गर्न प्रधानमन्त्री कार्यालयको निर्देशन

काठमाडौँ, कात्तिक १७ गते । प्रधानमन्त्री तथा मन्त्रीपरिषद्को कार्यालयले राष्ट्रिय गौरवको सुनकोशी–मरिण डाइभर्सन बहुउद्देश्यीय आयोजनाको ठेक्का प्रक्रिया संशोधित ऐन तथा नियमावली अनुसार तत्काल सुरु गर्न निर्देशन दिएको छ।

सिंहदरबारस्थित प्रधानमन्त्री तथा मन्त्रीपरिषद्को कार्यालयमा सोमबार बिहान बसेको उच्चस्तरीय बैठकले ऊर्जा, जलस्रोत तथा सिँचाइ मन्त्रालयलाई यस्तो निर्देशनात्मक आदेश दिएको हो। बैठकमा ऊर्जा मन्त्रालयले पनि राष्ट्रिय गौरवको यस आयोजनालाई निर्धारित समयसीमाभित्रै सम्पन्न गर्न आवश्यक सबै प्रक्रियाहरू प्राथमिकताका साथ अघि बढाउने प्रतिबद्धता व्यक्त गरेको छ।

सरकारले यसअघि सुनकोशी–मरिण डाइभर्सन आयोजनाको ठेक्का प्रक्रियामा गम्भीर कानुनी तथा प्रक्रियागत त्रुटिहरू फेला पारेपछि खरिद प्रक्रिया रद्द गर्ने निर्णय गरेको थियो। आयोजनाको प्राविधिक प्रस्ताव स्वीकृत भई गत कात्तिक १६ गते नै आर्थिक प्रस्ताव खोल्ने कार्यतालिका तय भइसकेको अवस्थामा प्रचलित कानुनी व्यवस्थाको पालना नभएको पाइएपछि सरकारले सो कदम चालेको थियो। संशोधित कानुनी प्रावधानहरूको पालना नगरी ठेक्का अघि बढाइएको देखिएकाले त्रुटि सच्याएर नयाँ ढङ्गले प्रक्रिया अगाडि बढाउनुपर्ने निष्कर्ष निकालिएको हो।

उक्त बैठकमा ऊर्जा, जलस्रोत तथा सिँचाइ मन्त्रालयका सचिव डा. जगदीश्वर कर्माचार्य, सिँचाइ विभागका महानिर्देशक दिनेश रजौरिया, आयोजना प्रमुख कृष्णप्रसाद रिजाल लगायतका इन्जिनियरहरूको उपस्थिति रहेको थियो। बैठकमा आयोजनाको हालसम्मको प्रगति र आगामी कार्ययोजनाबारे गम्भीर छलफल भएको थियो।

सरकारको यस निर्देशनपछि आयोजना निर्माणमा देखिएको कानुनी अन्योलता हट्ने र निर्धारित समयमै काम सम्पन्न गर्न मद्दत पुग्ने अपेक्षा गरिएको छ। बहुप्रतिक्षित यस राष्ट्रिय गौरवको आयोजनाले देशको सिँचाइ र ऊर्जा क्षेत्रमा महत्त्वपूर्ण योगदान पुर्‍याउने विश्वास लिइएको छ।