विपद्को समयमा नेपाल टेलिकमलाई सधैँ तयारी अवस्थामा राख्नुपर्छ : सञ्चारमन्त्री डा. तिमिल्सिना

काठमाडौँ, कात्तिक १७ गते । सूचना तथा सञ्चारमन्त्री डा. विक्रम तिमिल्सिनाले विपद्को जस्तोसुकै प्रतिकूल परिस्थितिमा पनि नेपाल टेलिकमलाई हमेशा तयारी अवस्थामा राख्नुपर्नेमा जोड दिनुभएको छ।

गत भदौ १० गतेको भोटेकोशी बाढीका कारण अवरुद्ध बनेको दूरसञ्चार सेवालाई युद्धस्तरमा पुनःस्थापना गर्न योगदान पुर्‍याउने कर्मचारीहरूलाई सम्मान गर्न सोमबार आयोजित विशेष कार्यक्रममा बोल्दै मन्त्री तिमिल्सिनाले विपद्का बेला पूर्वसूचना पाउनु नागरिकको जीवन बचाउन महत्त्वपूर्ण हुने बताउनुभयो। सबै सरोकारवाला निकायहरूको समन्वय र सहकार्यकै कारण बाढी प्रभावित क्षेत्रमा छिटो सेवा सुचारु गर्न सफल भएको उहाँको भनाइ थियो।

मन्त्री तिमिल्सिनाले टेलिकमका कर्मचारीहरूले तोकिएको जिम्मेवारीभन्दा बढी खटेर काम गरेको प्रशंसा गर्नुभयो। ऊर्जा मन्त्रालयले समेत तदारुकताका साथ संरचनाहरू निर्माण गरेकाले दूरसञ्चार सेवा पुनः सञ्चालन गर्न सहज भएको उहाँले उल्लेख गर्नुभयो। नागरिकहरूको नेपाल टेलिकमप्रतिको अपेक्षा उच्च रहेको बताउँदै मन्त्री तिमिल्सिनाले निजी क्षेत्रका कम्पनीहरू झैँ सेवा प्रवाहलाई थप द्रुत र प्रभावकारी बनाउनुपर्ने निर्देशन दिनुभयो।

साथै, कर्मचारीहरूको बोली र व्यवहारले संस्थाको प्रतिष्ठामा प्रत्यक्ष प्रभाव पार्ने भएकाले सचेत रहन उहाँले आग्रह गर्नुभयो।

कार्यक्रममा नेपाल टेलिकमकी प्रबन्ध निर्देशक सङ्गीता पहाडी अर्यालले यसअघि वार्षिकोत्सवका अवसरमा मात्र कर्मचारी सम्मान गर्ने गरिएकोमा भोटेकोशी बाढीपछि असाधारण योगदान दिने कर्मचारीहरूलाई यसपटक विशेष रूपमा सम्मानित गरिएको जानकारी दिनुभयो। मन्त्रालयका सचिव तथा टेलिकम सञ्चालक समितिका अध्यक्ष राजेन्द्रकुमार पौडेलको सभापतित्वमा सम्पन्न उक्त कार्यक्रममा वायरलेस निर्देशनालयका निर्देशक कृष्णप्रसाद भण्डारी र इञ्जिनीयर निशान्त नेपाल लगायतले विपद्को समयमा सेवा सुचारु गर्दाका अनुभवहरू साझा गरेका थिए।

सोही अवसरमा सञ्चारमन्त्री तिमिल्सिनाले बबरमहलमा हालै नवनिर्मित हुलाक प्रशिक्षण केन्द्रको भवनको समेत निरीक्षण गर्नुभएको थियो। हुलाक सेवा विभागका महानिर्देशक र कार्यालय प्रमुखले मन्त्रीलाई नवनिर्मित भवनको पूर्वाधार तथा सेवा विस्तारको योजनाबारे विस्तृत जानकारी गराएका थिए।