टेस्लाद्वारा ‘रियल लाइफ फ्लाइङ कार’ रोडस्टरको नयाँ संस्करण सार्वजनिक: रकेट थ्रस्टरको सहायताले हावामा उड्न सक्ने दाबी !

अमेरिकी विद्युतीय कार उत्पादक कम्पनी टेस्लाले टेक्ससमा आयोजित एक विशेष कार्यक्रमका बीच आफ्नो बहुप्रतिक्षित इलेक्ट्रिक स्पोर्ट्स कार ‘रोडस्टर’ को नयाँ संस्करण सार्वजनिक गरेको छ।

स्पेसएक्सको परिसरमा आयोजित एक डेमो कार्यक्रममार्फत कम्पनीले यसलाई ‘रियल लाइफ फ्लाइङ कार’ (वास्तविक जीवनको उड्ने कार) को रूपमा प्रस्तुत गरेको छ, जसमा रकेटमा प्रयोग हुने थ्रस्टरहरूको सहायताले जमिनबाट हावामा उड्ने र हावामै मोड्न सक्ने क्षमता रहेको छ।

टेस्लाका मुख्य कार्यकारी अधिकृत इलन मस्कले यो भिडियो एआई जेनेरेटेड नभई वास्तविक भएको प्रमाणित गर्न लाइभ डेमो प्रदर्शन गरिएको बताएका छन्।

टेस्ला र स्पेसएक्सका इन्जिनियरहरूको संयुक्त सहकार्यमा विकसित यो दुई सिटे कारमा अन्तरिक्षमा रकेटको दिशा परिवर्तन गर्न प्रयोग गरिने ‘कोल्ड–ग्याँस थ्रस्टर’ प्रविधि जडान गरिएको छ। कारमा ‘एल्टिट्यूड थ्रस्टर्स’ र पछाडिको भागमा ‘मेन थ्रस्टर्स’ राखिएका छन्, जसले कम्प्रेस्ड हावा वा ग्यासको उच्च दबाबका मार्फत गाडीलाई अतिरिक्त बल प्रदान गर्छ।

मस्कका अनुसार यो कारले मात्र ०.८१ सेकेन्डमा ९७ किलोमिटर प्रतिघण्टाको गति समात्न सक्नेछ, जुन बजारमा आएमा विश्वकै सबैभन्दा छिटो पिकअप लिने कार बन्नेछ। यद्यपि, यो हाल केवल एक ‘डेमो’ मात्र रहेको र व्यावसायिक उत्पादन तथा कडा सुरक्षा मापदण्डहरूबारे थप स्पष्टता आउन बाँकी छ।