प्रधानमन्त्री कार्यालय मातहतको सफ्टवेयर विकास केन्द्रद्वारा ४२ प्राविधिक विज्ञ पदका लागि खुला दरखास्त आह्वान: मासिक अढाई लाखसम्म तलब !

काठमाडौँ, असोज ३० गते । प्रधानमन्त्री तथा मन्त्रिपरिषद्को कार्यालय मातहतको सफ्टवेयर विकास तथा सञ्चालन केन्द्रले विभिन्न १५ वटा प्राविधिक विज्ञ पदका लागि कुल ४२ जना जनशक्ति माग गर्दै खुला प्रतिस्पर्धाबाट दरखास्त आह्वान गरेको छ।

केन्द्रले असोज २९ गते सूचना जारी गर्दै सरकारी निकायमा प्रयोग हुने सफ्टवेयर प्रणालीको विकास, स्तरोन्नति र मर्मतसम्भारका लागि करार सेवामा जनशक्ति पदपूर्ति गर्न लागेको हो।

प्रकाशित सूचना अनुसार न्यूनतम मासिक ४० हजार रुपैयाँदेखि अधिकतम २ लाख ५० हजार रुपैयाँसम्म पारिश्रमिक तोकिएको छ। सर्वाधिक २ लाख ५० हजार रुपैयाँ पारिश्रमिक रहेको प्रमुख प्रविधि विज्ञ पदका लागि सूचना प्रविधिसँग सम्बन्धित विषयमा स्नातकोत्तर गरी आर्किटेक्चर, टेक्नोलोजी स्ट्राटेजी, सेक्योरिटी र गभर्नेन्ससम्बन्धी दक्षता आवश्यक पर्नेछ।

यसैगरी, २ लाख रुपैयाँ पारिश्रमिक तोकिएको प्रोजेक्ट म्यानेजरसहित सेक्टर प्रमुख, सिस्टम एनालिस्ट, साइबर सुरक्षा विज्ञ, सिनियर डेभलपर, नेटवर्क एडमिनिस्ट्रेटर, क्वालिटी एनालिस्ट र यूआई/युएक्स डिजाइनर जस्ता पदहरूका लागि सम्बन्धित विषयमा स्नातक वा स्नातकोत्तर योग्यता तोकिएको छ।

इच्छुक तथा योग्य उम्मेदवारहरूले आगामी कात्तिक १८ गतेभित्र केन्द्रको अनलाइन पोर्टलमार्फत आवेदन दिन सक्नेछन्।

केन्द्रले प्रोजेक्ट म्यानेजर २ जना, प्रोजेक्ट तथा बिजनेस एनालिसिस सेक्टर प्रमुख १ जना, सिस्टम एनालिस्ट ४ जना, सिनियर डेभलपर ३ जना, सिस्टम/नेटवर्क/डाटाबेस एडमिनिस्ट्रेटर २ जना, क्वालिटी एनालिस्ट २ जना र मध्यम तहका डेभलपर १५ जनासहित कुल ४२ जनाका लागि आवेदन माग गरेको हो।

गत भदौ ३ मा नेपाल राजपत्रमा प्रकाशित ‘सफ्टवेयर विकास तथा सञ्चालन समिति (गठन) आदेश, २०८३’ बमोजिम स्थापित यस केन्द्रले सोही अधिकारअनुसार पदपूर्ति प्रक्रिया अघि बढाएको छ।

यद्यपि, यसै केन्द्रको कार्यकारी निर्देशकमा किरण तिम्सिनाको नियुक्तिलाई लिएर प्रतिपक्षी दल राष्ट्रिय प्रजातन्त्र पार्टीकी प्रमुख सचेतक खुश्बु ओलीले गत असोज १५ को प्रतिनिधि सभा बैठकमा नीतिगत भ्रष्टाचार र ‘ओपन सेटिङ’ भएको भन्दै प्रश्न उठाएकी थिइन्।