दसैँको अवसरमा सशस्त्र प्रहरीद्वारा काठमाडौं उपत्यकामा निःशुल्क बस सेवा सञ्चालन: ३ दिनसम्म दुई रुटमा बस चल्ने

काठमाडौं, कात्तिक २ गते । बडादसैँको अवसरमा काठमाडौं उपत्यकाभित्र सर्वसाधारण यात्रुहरूको सहज आवत-जावतका लागि सशस्त्र प्रहरी बल, नेपालले दुईवटा बसमार्फत निःशुल्क यातायात सेवा सञ्चालन गरेको छ।

दसैँको समयमा उपत्यकामा सार्वजनिक यातायातका साधनहरू अत्यन्तै न्यून मात्रामा चल्ने हुँदा सर्वसाधारणले भोग्नुपर्ने सास्तीलाई ध्यानमा राख्दै यो सराहनीय पहल गरिएको हो।

सशस्त्र प्रहरी बलको प्रधान कार्यालयबाट सञ्चालन हुने यो निःशुल्क बस सेवा आजदेखि लगातार तीन दिनसम्म बिहान ८ बजेदेखि बेलुकी ६ बजेसम्म सञ्चालन हुनेछ।

निर्धारित रुटअनुसार प्रधान कार्यालयबाट निस्कने पहिलो बसले बालाजु, नयाँ बसपार्क, कोटेश्वर, सातदोबाटो र बल्खु क्षेत्रका स्थानीय यात्रुहरूलाई सेवा प्रदान गर्नेछ भने दोस्रो बसले सितापाइला, कलंकी, बल्खु, कोटेश्वर र नयाँ बसपार्क हुँदै विभिन्न स्थानका यात्रुहरूलाई सेवा दिनेछ।

चाडपर्वका बेला सार्वजनिक यातायात नपाएर अलपत्र पर्ने नागरिकलाई सहज यात्राको सुविधा पुगोस् भन्ने उद्देश्यले यो सेवा निरन्तर रूपमा सञ्चालन गर्दै आइएको सशस्त्र प्रहरी नायब महानिरीक्षक तथा प्रवक्ता नेत्रबहादुर कार्कीले जानकारी दिनुभएको छ।