आईसीसी लिग-२: क्यानडासँग नेपाल २४ रनले पराजित , ओडीआई जोगाउन सोमबार ओमानलाई हराउनै पर्ने दबाब

काठमाडौँ, असोज ३१ गते । आइसिसी पुरुष विश्वकप क्रिकेट लिग-२ अन्तर्गत क्यानडासँगको खेलमा नेपाल २४ रनले पराजित भएको छ।

यस हारसँगै नेपाल लिग-२ को सातौं स्थानमा झरेको छ भने ३५ खेलमा २८ अंक बनाएको छ। प्रतियोगितामा आफ्नो अन्तिम खेल सोमबार ओमानविरुद्ध खेल्ने नेपालले सिधै ओडीआई मान्यता जोगाउन र तालिकाको छैटौं स्थान पक्का गर्न ओमानलाई पराजित गर्नैपर्ने दबाब बढेको छ।

ओमानको अल अमरात क्रिकेट ग्राउन्डमा टस जितेर ब्याटिङ गरेको क्यानडाले ५० ओभरमा सबै विकेट गुमाउँदै २ सय ५६ रनको योगफल तयार पारेको थियो। क्यानडाका लागि ओपनर युवराज साम्र्राले १ सय १७ बलमा १ सय ५ रनको उत्कृष्ट शतकीय इनिङ्स खेले। नेपालका लागि बलिङतर्फ ललित राजवंशीले उत्कृष्ट प्रदर्शन गर्दै ४ विकेट हात पारे भने कप्तान सन्दीप लामिछानेले ३ विकेट लिँदै जारी लिग-२ चक्रमा ५० विकेट पूरा गरे।

२ सय ५७ रनको लक्ष्य पछ्याउने क्रममा नेपालले ४६ ओभरमा सबै विकेट गुमाएर २ सय ३२ रन मात्र बनाउन सक्यो। नेपालका लागि अर्जुन कुमालले ८७ रनको जिम्मेवार अर्धशतकीय इनिङ्स खेले पनि अन्य ब्याटरहरूले गतिलो साथ दिन नसक्दा नेपाल पराजित हुन पुग्यो। क्यानडाका सुखजिन्दर सिंहले ३ विकेट लिए। यस जितसँगै २९ अंक जोडेको क्यानडा तालिकाको छैटौं स्थानमा उक्लिएको छ।