आइसिसीको मान्यतासँगै एनपिएलमा नियम कडा: एनओसीदेखि एन्टी–करपशन युनिटका नियम अनिवार्य

काठमाडौँ, असोज ३१ गते । अन्तरराष्ट्रिय क्रिकेट परिषद् (आइसिसी) बाट मान्यता पाएसँगै नेपाल प्रिमियर लिग (एनपिएल) मा खेलाडीको योग्यता, भ्रष्टाचार नियन्त्रण र खेल सञ्चालनसम्बन्धी नियमहरू थप कडा पारिने भएका छन्।

नेपाल क्रिकेट सङ्घ (क्यान) का सचिव पारस खड्काले कीर्तिपुरस्थित त्रिवि अन्तरराष्ट्रिय क्रिकेट मैदानमा आयोजित पत्रकार सम्मेलनमार्फत एनपिएल सञ्चालनका लागि आइसिसीको मापदण्डअनुसार कडा व्यवस्था गरिने जानकारी दिनुभएको हो।

प्रतियोगितामा सहभागी हुने विदेशी खेलाडीहरूले सम्बन्धित देशको क्रिकेट बोर्डबाट अनिवार्य रूपमा ‘नो अब्जेक्सन सर्टिफिकेट’ (एनओसी) लिनुपर्नेछ भने म्याच तथा स्पट फिक्सिङ नियन्त्रण गर्न आइसिसीको भ्रष्टाचारविरोधी आचारसंहिता (एसीयू) कडाइका साथ लागू गरिनेछ।

सचिव खड्काका अनुसार एनपिएल सुरु हुनुभन्दा अघिल्लो छ महिनाको अवधिमा सम्बन्धित निकायबाट स्वीकृति नलिएका वा गैरकानुनी क्रिकेट प्रतियोगिता खेलेका खेलाडीहरू यसपटकको प्रतियोगितामा सहभागी हुन पाउने छैनन्।

त्यस्तै, प्रत्येक फ्रेन्चाइज टिमले ६ देखि ८ जनासम्म विदेशी खेलाडी राख्न पाउनेछन् भने प्लेइङ इलेभेनमा ७ नेपाली र ४ विदेशी खेलाडी अनिवार्य गर्नुपर्नेछ। यसबाहेक, प्रतियोगितामा ‘डिआरएस’ (डिसिजन रिभ्यु सिस्टम) लागू गर्ने विषयमा समेत छलफल भइरहेको र यसबारे सोमबारसम्म औपचारिक निर्णय सार्वजनिक गरिने क्यानले जनाएको छ।