एमाले केन्द्रीय कार्यालयको सुरक्षामा पूर्वसैनिक तथा पूर्वप्रहरी खटिए: सरकारले सुरक्षा हटाएपछि कडा बनाइयो निगरानी

काठमाडौं, असोज ३० गते । नेपाल कम्युनिस्ट पार्टी (एमाले) ले आफ्नो केन्द्रीय कार्यालयको सुरक्षा व्यवस्थालाई थप कडा बनाएको छ। सरकारले लामो समयदेखि उपलब्ध गराउँदै आएको सुरक्षा सेवा हटाएपछि पार्टीले पूर्वसैनिक तथा पूर्वप्रहरीहरूको संगठनलाई कार्यालयको सुरक्षाको सम्पूर्ण जिम्मा सुम्पिएको हो।

कार्यालय परिसरमा सुरक्षा जोखिम बढेको महसुस गर्दै एमालेले आधुनिक सीसीटीभी क्यामेरा जडान गरी निगरानीसमेत बढाएको जनाएको छ।

विसं २०४८ देखि सरकारले एमाले केन्द्रीय कार्यालयलाई नियमित रूपमा दिँदै आएको सुरक्षा सेवा केही दिनअघि मात्रै हटाइएको थियो। त्यसपश्चात नयाँ व्यवस्था अनुरूप पूर्वसैनिक तथा पूर्वप्रहरीहरूको टोलीले २४ घण्टा नै कार्यालयको सुरक्षा पहरा दिइरहेको प्रचार विभाग प्रमुख निरज आचार्यले जानकारी दिनुभएको छ।