जनआस्थाका सम्पादक किशोर श्रेष्ठ साइबर ब्युरोबाट रिहा: समाचारको विवाद प्रेस काउन्सिलमा लैजान नेता हिमेश पन्त सहमत

काठमाडौँ, असोज ३१ गते । समाचारमा चित्त नबुझे प्रेस काउन्सिल नेपालमा उजुरी गर्न राष्ट्रिय स्वतन्त्र पार्टी (रास्वपा) का नेता एवं कलाकार हिमेश पन्त सहमत भएपछि जनआस्था साप्ताहिकका सम्पादक किशोर श्रेष्ठ रिहा हुनुभएको छ।

जनआस्थामा प्रकाशित धादिङको जग्गासम्बन्धी समाचारलाई लिएर पन्तले दिएको उजुरीका आधारमा प्रहरीले शनिबार श्रेष्ठलाई ललितपुरको नख्खुस्थित निवासबाट साइबर ब्युरोमा लगेको थियो।

समाचारमा चित्त नबुझे सम्बन्धित मिडियामा खण्डन पठाउने वा प्रेस काउन्सिलमा जाने वैधानिक प्रावधान हुँदाहुँदै काउन्सिलको क्षेत्राधिकार मिचेर पत्रकारलाई नियन्त्रणमा लिइएको भन्दै चौतर्फी आलोचना भएको थियो।

नेपाल पत्रकार महासंघले कडा आपत्ति जनाउँदै विनाशत तत्काल छाड्न माग गरेपछि दुवै पक्षबीच छलफल भई श्रेष्ठलाई छाडिएको जनआस्था अनलाइनका सम्पादक राजेन्द्र रिमाल र साइबर ब्युरोका प्रवक्ता दीपकराज अवस्थीले पुष्टि गरेका छन्।

रिहा भएपछि सामाजिक सञ्जालमा लेख्दै सम्पादक श्रेष्ठले प्रेस काउन्सिल नै सञ्चारमाध्यमविरुद्धका मुद्दा छिनोफानो गर्ने अधिकारिक निकाय भएको बताउँदै प्रेस जगत्को ऐतिहासिक एकताप्रति आभार व्यक्त गर्नुभएको छ।

यसअघि पत्रकारहरूलाई विद्युतीय कारोबार ऐनको दफा ४७ प्रयोग गरी साइबर अपराधसँग जोड्नु प्रेस स्वतन्त्रताविपरीत रहेको भन्दै विभिन्न विज्ञ तथा पत्रकार महासंघले गम्भीर चासो व्यक्त गरेका थिए।