राष्ट्रिय एकता, सद्भाव र समृद्ध नेपाल निर्माणमा योगदान गर्न दसैँले प्रेरणा दिनेछ: अध्यक्ष दाहाल

काठमाडौँ, असोज ३१ गते । राष्ट्रियसभाका अध्यक्ष नारायणप्रसाद दाहालले राष्ट्रिय एकता, सामाजिक सद्भाव, सहिष्णुता र पारस्परिक सम्मानलाई अझ सुदृढ बनाउँदै समुन्नत, समावेशी र समृद्ध नेपाल निर्माणमा योगदान गर्न बडादसैँले सबैलाई प्रेरणा प्रदान गर्ने विश्वास व्यक्त गर्नुभएको छ।

बडादसैँ–२०८३ का अवसरमा शनिबार शुभकामना सन्देश जारी गर्दै उहाँले सम्पूर्ण नेपालीहरूमा सुख, शान्ति, समृद्धि, सुस्वास्थ्य र उत्तरोत्तर प्रगतिको शुभकामना प्रकट गर्नुभएको छ।

अध्यक्ष दाहालले दसैँ केवल धार्मिक आस्थाको विषय मात्र नभई असत्यमाथि सत्य र अन्यायमाथि न्यायको विजयको प्रतीक तथा मान्यजनबाट टीका, जमरा र आशीर्वाद ग्रहण गर्ने एक महत्त्वपूर्ण मौलिक सांस्कृतिक पर्व भएको उल्लेख गर्नुभएको छ।

घटस्थापनादेखि विजयादशमीसम्मका धार्मिक अनुष्ठान र पारिवारिक पुनर्मिलनले हाम्रो सांस्कृतिक विरासत तथा पुस्तान्तरण हुँदै आएका संस्कारलाई जीवन्त राखेको उहाँको भनाइ छ। नेपाल बहुजातीय, बहुभाषिक र बहुसांस्कृतिक विविधताले समृद्ध राष्ट्र रहेको औंल्याउँदै उहाँले सबै धर्म र समुदायका चाडपर्वप्रति समान सम्मान र सहिष्णुता राख्दै विविधताभित्रको एकतालाई बलियो बनाउनु सबैको साझा दायित्व भएको बताउनुभएको छ।