काठमाडौँमा बढ्दै ‘डग होस्टेल’ को आकर्षण

काठमाडौँ, असोज ३१ गते । दसैँ नजिकिँदै गर्दा सङ्घीय राजधानी काठमाडौँमा चहलपहल बढेको छ र दसैँ मनाउन नयाँ उत्साह बोकेर धेरै मानिसहरू आफ्ना घर फर्किरहेका छन्।

तर, काठमाडौँमा कुकुर पालेर बसेका धेरै परिवारका लागि भने घर जाँदा कुकुरलाई कहाँ राख्ने भन्ने ठुलो अन्योल र चिन्ताको विषय बन्ने गरेको छ। यही समस्यालाई मध्यनजर गर्दै पछिल्लो समय काठमाडौँमा घरपालुवा कुकुरका लागि अस्थायी घर अर्थात् ‘डग होस्टेल’ हरूको प्रचलन र आकर्षण तीव्र रूपमा बढ्न थालेको छ।

‘डग होस्टेल’ हरूमा मालिकको अनुपस्थितिमा कुकुरहरूको खानपान, हेरचाह, सरसफाइ र दैनिक स्वास्थ्य निगरानीको विशेष प्रबन्ध मिलाइएको हुन्छ। ‘पज प्लेज एन्ड स्टे’ का सञ्चालक सन्दीप जोशी कुकुरलाई केवल सुरक्षाका लागि पाल्ने पालेको रूपमा नभई परिवारको सदस्य वा ‘कम्पेनियन एनिमल’ का रूपमा हेर्नुपर्ने बताउनुहुन्छ।

दुई रोपनी क्षेत्रफलमा बनेको यस होस्टेलमा वातानुकूलित कोठा, खेल्ने पर्याप्त ठाउँ र कुकुरको आकार (सानो, मध्यम र ठुलो) अनुसार प्रतिदिन दुई हजार पाँच सयदेखि तीन हजार पाँच सय रुपियाँसम्मको लागतमा प्रिमियम सेवा उपलब्ध गराउँदै आइएको छ।

त्यसैगरी, काठमाडौँमै ‘पेट स्पा’ सञ्चालन गर्दै आएका गोविन्द भण्डारी कुकुरको सुरक्षा निकै संवेदनशील हुने भएकाले यो पेसा जोखिमपूर्ण रहेको बताउँछन्।

जर्मन सेफर्ड, गोल्डेन रिट्राइभर, हस्की र जापानिज स्पिट्ज जस्ता विभिन्न नश्लका कुकुरहरूलाई प्रजाति र आवश्यकता अनुसार प्रतिदिन आठ सयदेखि एक हजार चार सय रुपियाँसम्मको शुल्कमा हेरचाह गर्ने गरिएको छ।

‘भेट फर यर पेट’ अस्पतालका डा. एकता पाण्डेका अनुसार होस्टेलमा राख्नुअघि कुकुरको पूर्ण स्वास्थ्य जाँच, खोपको विवरण र मानसिक स्वास्थ्यमा समेत विशेष ध्यान दिनु अनिवार्य हुन्छ। दसैँ, तिहार वा अन्य चाडपर्वमा मात्र नभई घरका सबै सदस्य बाहिर जाँदा यी होस्टेलहरू पाल्तु जनावरका लागि सुरक्षित ‘भ्याकेसन’ स्पट बन्दै गएका छन्।