घरमा एक्लै भएकी वृद्धामाथि हँसिया प्रहार गरी सुनको सिक्री लुट्ने युवक पक्राउ

गुल्मी, असोज ३१ गते । गुल्मीको रेसुङ्गा नगरपालिकामा घरमा कोही नभएको मौका छोपी एक वृद्धामाथि हँसिया प्रहार गरी सुनको सिक्री लुटेको आरोपमा एक युवक पक्राउ परेका छन्। स्थानीयवासी र प्रहरीको संयुक्त प्रयासमा उनलाई नियन्त्रणमा लिइएको हो।

रेसुङ्गा नगरपालिका–१३, भँगेरीकी ६५ वर्षीया यमकला छन्त्यालको घरमा एक्लो, असहाय अवस्थाको फाइदा उठाउँदै सुनको सिक्री लुटपाट गर्नुका साथै टाउकोमा हँसिया प्रहार गरी घाइते बनाएको आरोपमा रेसुङ्गा नगरपालिका–१२ का ३३ वर्षीय सोनु कामी पक्राउ परेका हुन्। जिल्ला प्रहरी कार्यालय गुल्मीका प्रहरी नायब उपरीक्षक वीरेन्द्रवीर विश्वकर्माले घटनाको पुष्टि गर्दै यस विषयमा विस्तृत जानकारी दिनुभएको छ।

घटनाको सूचना प्राप्त हुनासाथ तुरुन्तै सक्रिय बनेका प्रहरी र स्थानीय बासिन्दाले खोजी कार्य तीव्र बनाएका थिए। सोही क्रममा गुल्मी दरबार गाउँपालिका–७, बोटे क्षेत्रबाट भाग्दै गरेका अवस्थामा आरोपी कामीलाई नियन्त्रणमा लिई जिल्ला प्रहरी कार्यालय गुल्मीमा ल्याइएको छ।

आक्रमणबाट गम्भीर घाइते हुनुभएकी वृद्धा छन्त्यालको हाल गुल्मी अस्पताल, तम्घासमा उपचार भइरहेको छ। प्रहरीले घटनास्थलबाट लुटिएको एक तोलाको सुनको सिक्री र घटनामा प्रयोग भएको हँसियासमेत बरामद गरेको छ भने यस सम्बन्धमा थप अनुसन्धान भइरहेको जनाएको छ।