दसैँ पर्वले सत्यको बाटोमा हिँड्न र नकारात्मक प्रवृत्तिमाथि विजय प्राप्त गर्न प्रेरणा मिलोस्: प्रधानमन्त्री वालेन्द्र शाह

काठमाडौँ, असोज ३१ गते । प्रधानमन्त्री वालेन्द्र शाहले बडादसैँका अवसरमा स्वदेश तथा विदेशमा रहनुभएका सम्पूर्ण नेपाली दिदीबहिनी तथा दाजुभाइहरूमा सुख, शान्ति, समृद्धि र आरोग्यको हार्दिक मंगलमय शुभकामना व्यक्त गर्नुभएको छ।

दसैँको अवसरमा शुभकामना सन्देश जारी गर्दै उहाँले यो पर्वले विश्वभर छरिएर रहेका नेपालीलाई एकताबद्ध गर्दै हरेक घरमा उत्सव र उमङ्ग ल्याओस् भन्ने कामना गर्नुभएको छ। दसैँलाई धार्मिक, सामाजिक तथा सांस्कृतिक महत्त्व बोकेको एकता, आत्मीयता र पारिवारिक मिलनको पर्वका रूपमा उल्लेख गर्दै उहाँले मान्यजनबाट टीका र जमरा ग्रहण गरी आशीर्वाद लिने परम्पराले नेपाली मौलिक संस्कारलाई प्रतिबिम्बित गर्ने बताउनुभएको छ।

विभिन्न सङ्कटपूर्ण परिस्थितिमा पनि नेपालीले मौलिकता र सांस्कृतिक मूल्यमान्यताको जगेर्ना गर्दै चाडपर्व मनाउँदै आएको चर्चा गर्नुहुँदै प्रधानमन्त्री शाहले यस वर्ष रसुवा, नुवाकोट र गोरखा लगायतका स्थानमा भएका विपद्का घटनाप्रति गहिरो दुःख व्यक्त गर्नुभएको छ। विपद्मा ज्यान गुमाउनेहरूप्रति श्रद्धाञ्जली अर्पण गर्दै उहाँले शोकसन्तप्त परिवारमा समवेदना र घाइतेहरूको शीघ्र स्वास्थ्यलाभको कामना गर्नुका साथै विस्थापित नागरिकको पुनःस्थापनाका लागि सरकारले तीव्र रूपमा काम गरिरहेको जानकारी दिनुभएको छ।

दसैँलाई असत्यमाथि सत्यको विजयको प्रतीकका रूपमा व्याख्या गर्दै उहाँले काम, क्रोध, लोभ, ईर्ष्या र अहङ्कारजस्ता मानवीय दुर्गुणमाथि विजय प्राप्त गर्नुपर्ने र सामाजिक रूपमा खराब प्रवृत्तिको अन्त्य हुनुपर्ने सन्देश दिनुभएको छ।

शुभकामना सन्देशमा प्रधानमन्त्री शाहले रोजगारी तथा आर्थिक अवसरको अभावमा विदेशिन बाध्य नेपालीहरूको अवस्थाप्रति गहिरो चिन्ता व्यक्त गर्नुभएको छ। चाडपर्वका बेला परिवारसँग बस्न चाहँदाचाहँदै पनि घर फर्कन नपाउने नेपालीको नियति बदल्न सबैको सहकार्य आवश्यक रहेको र आर्थिक अभावका कारण दसैँ कसैका लागि पनि बोझ बन्न नहुने उहाँको भनाइ छ।

देशको समृद्धि, नागरिकको सुखद जीविका र सुशासनका लागि वर्तमान सरकार पूर्ण रूपमा प्रतिबद्ध रहेको स्पष्ट पार्दै उहाँले माता दुर्गाभवानीको कृपा सबैमा रहिरहोस् भनी सभ्य र भव्य रूपमा दसैँ मनाउन आग्रह गर्नुभएको छ।