दसैँमा विद्युत् आपूर्ति नियमित र भरपर्दो बनाउन नेपाल विद्युत् प्राधिकरणको निर्देशन: ‘नो लाइट’ सेवा २४ सै घण्टा तयारीमा

काठमाडौँ, असोज ३० गते । नेपाल विद्युत् प्राधिकरणले बडा दसैँका अवसरमा देशैभर विद्युत् आपूर्तिलाई नियमित, भरपर्दो र गुणस्तरीय बनाउन सबै वितरण केन्द्रहरूलाई उच्च सतर्कता र तयारी अवस्थामा रहन निर्देशन दिएको छ।

दसैँको समयमा औद्योगिक र व्यावसायिक गतिविधिमा कमी आए पनि घरपरिवार, धार्मिक स्थल तथा बजार क्षेत्रमा विद्युत् खपतको प्रकृति फरक हुने भएकाले विद्युत् प्रणालीको सुरक्षित सञ्चालनलाई प्राधिकरणले उच्च प्राथमिकतामा राखेको छ।

प्राधिकरणका कार्यकारी निर्देशक दीर्घायुकुमार श्रेष्ठ र वितरण तथा ग्राहक सेवा निर्देशनालयका प्रमुख राजन ढकालले शुक्रबार प्रादेशिक कार्यालय, प्रदेश डिभिजन कार्यालय तथा वितरण केन्द्रका प्रमुखहरूसँग भर्चुअल बैठक गर्दै दसैँ अवधिभर विद्युत् आपूर्तिमा कुनै पनि प्रकारको अवरोध हुन नदिन विशेष निर्देशन दिनुभएको हो।

प्रसारण लाइन तथा वितरण प्रणालीको निरीक्षण र मर्मतसम्भारको कार्य तत्काल सम्पन्न गरी सम्भावित जोखिमहरू न्यूनीकरण गर्न र सेवामा अवरोध आए तत्काल मर्मतसम्भार गर्न प्राविधिक टोलीलाई हरबख्त तयार राख्न निर्देशन दिइएको छ।

साथै, चाडपर्वको समयमा उपभोक्ताबाट विद्युत् आपूर्तिसम्बन्धी आउने गुनासोहरूलाई तत्काल सम्बोधन गर्न ‘नो लाइट’ सेवामा फोन उठाउने व्यवस्थालाई थप प्रभावकारी बनाउन भनिएको छ। प्राधिकरणले माग र आपूर्तिको अवस्थालाई निरन्तर अनुगमन गर्दै आएको जनाएको छ।

यसका साथै, चाडपर्वमा विद्युतीय उपकरणहरूको सुरक्षित प्रयोग गर्न, गुणस्तरहीन सामग्री प्रयोग नगर्न तथा तारमा कुनै समस्या देखिएमा आफैँ मर्मत नगरी दक्ष प्राविधिकको सहयोग लिन समेत प्राधिकरणले सम्पूर्ण उपभोक्ताहरूलाई विशेष अनुरोध गरेको छ।