राष्ट्रपति रामचन्द्र पौडेलद्वारा दुई अध्यादेश जारी

काठमाडौँ, असोज ३० गते । राष्ट्रपति रामचन्द्र पौडेलले दुई वटा नयाँ अध्यादेशहरू जारी गर्नुभएको छ। नेपाल सरकार, मन्त्रिपरिषद्को सिफारिसमा राष्ट्रपति पौडेलले शुक्रबार नेपालको संविधानको धारा ११४ को उपधारा (१) बमोजिम ती अध्यादेशहरू जारी गर्नुभएको हो।

राष्ट्रपति कार्यालयका सहायक प्रवक्ता धर्मराज गैरेद्वारा जारी जानकारीअनुसार स्वीकृत भएका अध्यादेशहरूमा ‘नेपाल विज्ञान, प्रविधि तथा नवप्रवर्तन प्रज्ञा–प्रतिष्ठान अध्यादेश, २०८३’ र ‘विज्ञान, प्रविधि तथा नवप्रवर्तन अध्यादेश, २०८३’ रहेका छन्। देशमा विज्ञान, प्रविधि तथा नवप्रवर्तनको क्षेत्रलाई थप व्यवस्थित गर्दै प्रज्ञा–प्रतिष्ठानमार्फत यससम्बन्धी गतिविधिहरू अघि बढाउनका लागि यी अध्यादेशहरू ल्याइएका हुन्।