भक्तपुरलाई शिक्षा, स्वास्थ्य र पर्यटनको माध्यमबाट नमुना जिल्ला बनाइनेछ: मुख्यमन्त्री किरण थापामगर

भक्तपुर, असोज २९ गते । बागमती प्रदेशका मुख्यमन्त्री किरण थापामगरले शिक्षा, स्वास्थ्य, पर्यटन र योगको आधारमा भक्तपुर जिल्लालाई एक नमुना जिल्ला बनाउने प्रतिबद्धता व्यक्त गर्नुभएको छ।

सूर्यविनायक नगरपालिकालाई बालमैत्री स्थानीय शासनयुक्त नगरपालिका घोषणा गर्दै आयोजित एक विशेष कार्यक्रममा उहाँले भक्तपुरको विकास र समृद्धिको यात्रामा प्रदेश सरकारले स्थानीय तहहरूसँग सहकार्य र साझेदारी गर्दै अघि बढ्ने स्पष्ट पार्नुभयो।

मुख्यमन्त्री थापामगरले गुणस्तरीय शिक्षा तथा सुलभ स्वास्थ्य सेवाको पहुँच विस्तार, ऐतिहासिक तथा सांस्कृतिक सम्पदाको प्रवर्द्धन र शारीरिक तथा मानसिक स्वास्थ्यका लागि योग तथा प्राकृतिक चिकित्सा प्रणालीको विकास गर्ने सरकारको प्रमुख योजना रहेको बताउनुभयो।

कार्यक्रममा सूर्यविनायक नगरपालिकाका प्रमुख वासुदेव थापाले नगरपालिकाका १० वटै वडाले नेपाल सरकारले निर्धारण गरेका ५१ र नगरपालिकाको थप १ गरी कुल ५२ वटै सूचक पूर्ण रूपमा पालना गरेरै नगरलाई आधिकारिक रूपमा बालमैत्री घोषणा गरिएको जानकारी दिनुभयो।

सो अवसरमा बागमती प्रदेशका प्रमुख सचिव कमल भट्टराई, उपप्रमुख सरिता तिम्सिना भट्टराई, प्रवक्ता रवीन्द्र सापकोटा लगायतका वक्ताहरूले बालबालिकाको अधिकार र भविष्य सुरक्षित गर्न नगरपालिकाले हासिल गरेको यो उपलब्धि निकै प्रसंशनीय रहेको बताएका थिए। कार्यक्रममा विभिन्न बालपत्रिकाको विमोचन गरिनुका साथै स्थानीय तथा पौराणिक संस्कृति झल्कने विविध ऐतिहासिक नृत्यहरू समेत प्रस्तुत गरिएको थियो।