आगामी स्थानीय तह निर्वाचनका लागि रास्वपाद्वारा ‘उम्मेदवार छनोट रूपरेखा, २०८३’ सार्वजनिक; क्यान्डिडेट क्लबमा आवेदन खुला

काठमाडौँ, असोज ३० गते । राष्ट्रिय स्वतन्त्र पार्टी (रास्वपा) ले आगामी स्थानीय तहको निर्वाचनलाई लक्षित गर्दै उम्मेदवार छनोटका लागि ‘स्थानीय निर्वाचनका लागि उम्मेदवार छनोट रूपरेखा, २०८३’ सार्वजनिक गरेको छ।

केन्द्रीय समितिबाट जारी गरिएको ४४ पृष्ठको यस रूपरेखामा उम्मेदवार छनोटमा पारदर्शी मूल्याङ्कन, आन्तरिक प्रतिस्पर्धा र जनउत्तरदायी नेतृत्व चयनमा विशेष जोड दिइएको छ। व्यक्तिगत प्रभाव र नातावादभन्दा माथि उठી वैज्ञानिक एवं संस्थागत मूल्याङ्कनलाई प्राथमिकता दिने उद्देश्यले यो मापदण्ड तयार गरिएको रास्वपाले जनाएको छ।

नयाँ मापदण्ड अनुसार स्थानीय तहमा उम्मेदवार बन्न इच्छुक व्यक्तिले सर्वप्रथम पार्टीको ‘क्यान्डिडेट क्लब’ मा आवेदन दिनुपर्ने व्यवस्था गरिएको छ। त्यसपछि नेतृत्व विकाससम्बन्धी प्रशिक्षण र निर्धारित छनोट प्रक्रियामा सहभागी हुनुपर्नेछ। उम्मेदवारका लागि कानुनी योग्यता, वैचारिक प्रतिबद्धता, उच्च आचरण तथा सार्वजनिक व्यवहारलाई आधार बनाइएको छ भने गम्भीर फौजदारी कसुरमा सजाय पाएका व्यक्तिहरूलाई आवेदन दिन निषेध गरिएको छ।

साथै, समावेशी प्रतिनिधित्वलाई सुनिश्चित गर्दै सचिवालयले १५ प्रतिशतसम्म विशेषाधिकार प्रयोग गर्न सक्ने व्यवस्था पनि गरिएको छ।

यसैबिच, रास्वपाले आगामी निर्वाचनका लागि नगरपालिकाको प्रमुख, उपप्रमुख, वडाध्यक्ष र वडा सदस्य पदमा उम्मेदवार बन्न इच्छुक व्यक्तिहरूका लागि बिहीबारदेखि ‘नगरपालिका क्यान्डिडेट क्लब’ मा आवेदनसमेत खुला गरेको छ। इच्छुक व्यक्तिले पार्टीको आधिकारिक मोबाइल एपमार्फत आवेदन दिन सक्ने सहमहामन्त्री निशा डाँगीले जानकारी दिनुभएको छ।

यसअघि रास्वपाले गाउँपालिकातर्फका उम्मेदवारहरूका लागि पनि आवेदन आह्वान गरिसकेको छ।