सांसद खगेन्द्र सुनारमाथि लागेको गम्भीर आरोपबारे रास्वपाको ध्यानाकर्षण: आन्तरिक छानबिनका लागि अनुशासन आयोगलाई निर्देशन

काठमाडौँ, असोज २७ गते । राष्ट्रिय स्वतन्त्र पार्टी (रास्वपा) ले सांसद खगेन्द्र सुनारका सम्बन्धमा सञ्चारमाध्यममा प्रकाशित समाचार, सार्वजनिक भएका श्रव्य सामग्री र उठाइएका प्रश्नहरूप्रति गम्भीर ध्यानाकर्षण भएको जनाएको छ। रास्वपा महामन्त्री विपिनकुमार आचार्यले मंगलबार विज्ञप्ति जारी गर्दै सांसद सुनारमाथि लागेका आरोपहरू अत्यन्त गम्भीर र संवेदनशील रहेको बताएका हुन्।

‘जनआस्था’ साप्ताहिकले सांसद सुनारमाथि विवाहको प्रलोभनमा पारी अश्लील भिडियो बनाएर ब्ल्याकमेल गरेको, मार्ने धम्की दिएको तथा शङ्कास्पद आर्थिक लेनदेन गरेको दाबीसहित अडियो र बैंकिङ कारोबारको विवरण सार्वजनिक गरेपछि पार्टीले यो कदम चालेको हो।

महिलामाथि हुने दुर्व्यवहार, पदीय मर्यादाको उलङ्घन र फौजदारी कसुरका विषयमा पार्टीको शून्य सहनशीलताको नीति रहेको महामन्त्री आचार्यले प्रष्ट पार्नुभएको छ। सत्य-तथ्य पत्ता लगाउन पार्टीको केन्द्रीय अनुशासन आयोगलाई तत्काल आन्तरिक छानबिन प्रक्रिया अगाडि बढाउन निर्देशन दिइएको छ।

साथै, अनुसन्धानलाई प्रभावित हुन नदिन र पदीय नैतिकता कायम राख्न छानबिन निष्कर्षमा नपुगुन्जेलसम्म सांसद सुनारलाई सार्वजनिक पदको हैसियतमा कुनै पनि औपचारिक कार्यक्रममा सहभागी नहुन निर्देशन दिइएको छ। राज्यका निकायले गर्ने अनुसन्धानमा पार्टीले पूर्ण रूपमा सहयोग गर्ने प्रतिबद्धता पनि व्यक्त गरिएको छ।