विदेशमा रहेका नेपालीको वंशजको नागरिकता निरन्तरताबारे दुई साताभित्र प्रतिवेदन बुझाइने: गृहमन्त्री गुरुङ

काठमाडौँ, असोज २९ गते । गृहमन्त्री सुधन गुरुङले विदेशमा रहेका नेपाली तथा तिनका सन्तानको वंशजको नेपाली नागरिकता निरन्तरताबारे गृह मन्त्रालयले गठन गरेको कार्यदलले करिब दुई साताभित्र प्रतिवेदन बुझाउने जनाएका छन्।

तमु प्ये ल्हु संघ यूकेका पूर्वअध्यक्ष सोम त्होर्जे गुरुङ नेतृत्वको प्रतिनिधिमण्डलसँग बुधबार राति मन्त्रीनिवास पुल्चोकमा भएको भेटमा उनले कार्यदलको प्रतिवेदनका आधारमा यस विषयमा थप प्रक्रिया अघि बढाइनेसमेत बताएका हुन्।

भेटका क्रममा प्रतिनिधिमण्डलले विदेशमा रहेका नेपाली तथा नेपाली मूलका व्यक्तिको वंशजको नागरिकता निरन्तरता सुनिश्चित गर्न कानुनी तथा संवैधानिक प्रक्रिया अघि बढाउन माग गर्दै गृहमन्त्रीलाई मागपत्र बुझाएको थियो। नागरिकता ऐन, २०६३ को दफा १० को उपदफा (१) खारेज वा आवश्यक संशोधन गर्नुपर्ने तथा गैरआवासीय नेपाली नागरिकता र वंशजको नागरिकताको विषयलाई फरक रूपमा सम्बोधन गर्नुपर्ने माग सो अवसरमा उठाइएको थियो।

गृहमन्त्री गुरुङले विदेशमा रहेका नेपालीका समस्या समाधान गर्न सरकार सकारात्मक रहेको स्पष्ट पार्दै नागरिकताको विषयमा सबैलाई सम्बोधन हुने गरी आवश्यक पहल गर्ने बताएका छन्।

साथै, गैरआवासीय नेपाली परिचयपत्र (एनआरएनए कार्ड) लगायतका क्षेत्रमा देखिएका व्यावहारिक तथा कानुनी समस्या समाधान गर्न कानुन संशोधनको तयारी भइरहेको र त्यससम्बन्धी प्रस्ताव मन्त्रिपरिषद्मा पेस गर्न लागिएको जानकारी पनि उनले दिएका छन्।