ट्रम्पको घोषणा: ग्रिनल्यान्डमा तेल, ग्यास तथा खनिजको विशाल भण्डार अन्वेषण गरिँदै

काठमाडौँ, असोज २८ गते । अमेरिकी राष्ट्रपति डोनाल्ड ट्रम्पले ग्रिनल्यान्डमा तेल, ग्यास तथा खनिजको विशाल भण्डार अन्वेषण गर्ने तयारी भइरहेको बताउनुभएको छ। उहाँले ग्रिनल्यान्डलाई अमेरिका र युरोपको सुरक्षाका दृष्टिले अत्यन्त महत्वपूर्ण क्षेत्रका रूपमा प्रस्तुत गर्नुभएको छ।

ट्रम्पले आफ्नो सामाजिक सञ्जाल ‘ट्रुथ सोसल’मा लेख्दै ग्रिनल्यान्डमा तेल, ग्यास र खनिजको अन्वेषण सुरु गर्ने तयारी भइरहेको जनाउनुभएको हो। उहाँले विज्ञलाई उद्धृत गर्दै त्यहाँ सहजै निकाल्न सकिने तेलको मात्रा विश्वका अन्य स्थानको तुलनामा निकै धेरै रहेको दाबी गर्नुभएको छ।

रुस र अमेरिकाबिच क्षेप्यास्त्र प्रहारका लागि सबैभन्दा छोटो मार्गमा पर्ने ग्रिनल्यान्ड ट्रम्पले प्रस्ताव गर्नुभएको ‘गोल्डेन डोम’ क्षेप्यास्त्र प्रतिरक्षा प्रणालीका लागि पनि रणनीतिक महत्त्वको क्षेत्र हो।

ग्रिनल्यान्डमाथि बलपूर्वक नियन्त्रण कायम गर्ने धम्की दिनुभएका ट्रम्पले गत सेप्टेम्बरमा ग्रिनल्यान्ड र डेनमार्कका नेतासँग सुरक्षा सम्झौतामा हस्ताक्षर गर्दै दुई नयाँ सैन्य आधार निर्माण गर्ने घोषणा गरिसक्नुभएको छ।