सूर्यविनायक–धुलिखेल सडक विस्तारको काम तीव्र गतिमा: काभ्रेतर्फ ७४ र भक्तपुरतर्फ ५४ प्रतिशत प्रगति

बनेपा, असोज २८ गते । अरनिको राजमार्ग अन्तर्गत सूर्यविनायकदेखि काभ्रेपलाञ्चोकको धुलिखेलसम्मको सडक विस्तारको कामलाई निर्धारित समयभित्रै सम्पन्न गर्ने लक्ष्यसहित तीव्रता दिइएको छ। भक्तपुरको सूर्यविनायकदेखि धुलिखेलसम्मको १५.८ किलोमिटर सडकलाई ६ लेनमा विस्तार गर्ने क्रममा हालसम्म उल्लेखनीय भौतिक प्रगति हासिल भएको आयोजनाले जनाएको छ।

सूर्यविनायक–धुलिखेल सडक आयोजनाका प्रमुख सुपरिन्टेन्डेन्ट इन्जिनियर विजयकुमार महतोका अनुसार सडकलाई सूर्यविनायक–साँगा र साँगा–धुलिखेल गरी दुई खण्डमा विभाजन गरेर विस्तार भइरहेको छ। जसमध्ये काभ्रेतर्फको साँगा–धुलिखेल खण्डमा ७४ प्रतिशत भौतिक प्रगति भएको छ भने भक्तपुरतर्फको सूर्यविनायक–साँगा खण्डमा ५४ प्रतिशत काम सम्पन्न भएको छ। भक्तपुरतर्फ ठेक्का सम्झौता केही ढिलो भएकाले प्रगति दर कम देखिएको हो।

साँगा–धुलिखेल खण्डको ७.९ किलोमिटर सडकमध्ये साढे छ किलोमिटरमा चार लेनको पहिलो तहको कालोपत्रे गरिएको छ। यस्तै, यस खण्डमा ६ लेन सडकको पहिलो तहको कालोपत्रे साढे तीन किलोमिटरमा सम्पन्न भइसकेको छ।

काभ्रेतर्फको मुख्य काम आगामी मङ्सिर २३ गतेसम्म सम्पन्न गर्ने लक्ष्य राखिएको छ भने सूर्यविनायक–साँगा खण्डको काम आगामी फागुनसम्ममा सक्ने गरी म्याद थप गरिएको छ। आवश्यकताअनुसार समय थप गरी आगामी असारसम्ममा सम्पूर्ण निर्माण कार्य पूर्ण रूपमा सम्पन्न गरिने आयोजना प्रमुख महतोले जानकारी दिनुभयो।

सडक विस्तारको कामले गति लिए पनि जगाती खोला, महादेव खोला र पुण्यमाता खोलामा पुल निर्माण समयमै हुन नसक्दा यातायात सञ्चालनमा भने केही समस्या देखिएको छ।

पुलको डिजाइनका विषयमा सुरुदेखि नै विवाद हुँदा निर्माण कार्य प्रभावित भएको हो। विशेषगरी रातको समयमा बढी भार बोकेका टिप्पर सञ्चालन हुँदा पुल आसपासका सडकमा खाल्टा पर्ने र जाम हुने समस्या रहेकाले चाडपर्वका बेला सहजताका लागि ती खाल्टा पुर्ने र रोलर लगाएर सतह मिलाउने काम गरिने जनाइएको छ।