चाडपर्वका बेला राजमार्गमा गुणस्तरहीन खाना खुवाए सवारी चालक र होटल सञ्चालकलाई कडा कारबाही

काठमाडौँ, असोज २७ गते । सरकारले चाडपर्वको समयमा यात्राका क्रममा राजमार्गमा यात्रुहरूलाई गुणस्तरहीन खाना खुवाउने सवारी चालक र होटल सञ्चालकहरूलाई कारबाही गर्ने भएको छ।

यातायात व्यवस्था विभागका निर्देशक मणिराम भुसालले एक सूचना जारी गर्दै चाडपर्वमा यात्रा गर्ने यात्रुलाई बासी, झिँगा भन्केका तथा न्यून गुणस्तरका खाद्यवस्तु खुवाएर बिरामी पारेमा प्रचलित कानुनबमोजिम कडा कारबाही गरिने स्पष्ट पार्नुभएको छ।

भौतिक पूर्वाधार विकास मन्त्रालयमा भएको सरोकारवाला निकायको बैठकको निर्णयअनुसार जारी गरिएको यो निर्देशनमा सार्वजनिक यातायातका चालकहरूले सफा, स्वच्छ र गुणस्तरीय खाना पाइने स्थानका होटल तथा रेस्टुरेन्टलाई मात्र प्राथमिकता दिनुपर्ने उल्लेख छ। सम्भव भएसम्म खाद्य प्रविधि तथा गुण नियन्त्रण विभागको खाद्य स्वच्छतासम्बन्धी स्टिकर टाँसिएका होटलमा मात्र यात्रुहरूलाई खाना तथा खाजाका लागि रोक्नुपर्नेछ।

होटल तथा रेस्टुरेन्टमा स्वच्छताको कमी वा मूल्यमा ठगी भएको पाइएमा यात्रुहरूले तत्काल गुनासो गर्न सक्ने व्यवस्था मिलाइएको छ। त्यस्ता समस्या देखिएमा नेपाल प्रहरीको हेल्पलाइन नम्बर १०० मा वा नजिकैको जिल्ला प्रशासन कार्यालय, ट्राफिक कार्यालय तथा खाद्य प्रविधि तथा गुण नियन्त्रण विभागका कार्यालयहरूमा सम्पर्क गरेर उजुरी दिन सकिने विभागले जनाएको छ।