इथियोपियामा पुनः सुरु भएको हिंसा रोक्न संयुक्त राष्ट्रसंघका महासचिव गुटेरेसद्वारा आग्रह

काठमाडौँ, असोज २४ गते । संयुक्त राष्ट्रसंघका महासचिव एन्टोनियो गुटेरेसले इथियोपियाको उत्तरी क्षेत्रमा पुनः सुरु भएको हिंसालाई तत्काल रोक्न सम्बन्धित सबै पक्षलाई जोडदार आग्रह गर्नुभएको छ। महासचिवका प्रवक्ता स्टेफन दुजारिकमार्फत जारी गरिएको वक्तव्यमा टिग्रे, अफार र अम्हारा क्षेत्रमा पुनः लडाइँ सुरु भएकोप्रति गहिरो चिन्ता व्यक्त गरिएको छ।

महासचिव गुटेरेसले सबै पक्षलाई तत्काल युद्धविराम लागू गर्न र पूर्वप्रिटोरिया सम्झौताको मर्म अनुसार पुनः शान्ति वार्तार्तफ फर्कन आह्वान गर्नुभएको छ। द्वन्द्व थप चर्किएमा त्यसले समग्र क्षेत्रीय शान्ति, स्थिरता र मानवीय अवस्थामा गम्भीर असर पार्ने चेतावनी दिँदै उहाँले संयमता अपनाउन अनुरोध गर्नुभएको छ। साथै, अन्य देशको आन्तरिक मामिलामा हस्तक्षेप नगर्न र भौगोलिक अखण्डता तथा राजनीतिक स्वतन्त्रताको सम्मान गर्न सबै राष्ट्रहरूसँग आग्रह गरिएको छ।

द्वन्द्वरत पक्षहरूमाथि प्रभाव राख्ने बाह्य राष्ट्रहरूलाई पनि तनाव कम गर्न सकारात्मक सहयोग पुर्‍याउन र द्वन्द्वलाई मलजल गर्ने गतिविधिबाट टाढा रहन आह्वान गरिएको छ। इथियोपियाको यस सङ्कटको उचित समाधानका लागि संयुक्त राष्ट्रसंघ जुनसुकै बेला मध्यस्थता गर्न तयार रहेको महासचिवले स्पष्ट पार्नुभएको छ।